"Канвон-2024" залуучуудын өвлийн олимпын эрэгтэй цаначдын 7.5 км-ийн уралдаан “Alpensia Biathlon Centre”-т явагдлаа. Энэ гараанд 79 тамирчин хурд сориход Германы Якоб Элиас Мох 19:47.2 минутаар түрүүлж, Канвоны олимпын хоёр дахь медалиа өөрийн болгов. 17 настай энэ тамирчин энэ сарын 29-ний өдөр болсон спринт уралдаанд тэргүүлэгчээс 0.33 секунд хоцрон дэд байрт орсон юм.

           Тус гараанд хурд сорьсон манай тамирчин, ОУХМ Т.Өсөх-Ирээдүй тун сайн уралдаж, 79 тамирчнаас 22-р байрт орлоо. Тэрбээр өөрийн зайг 20:51.9 минутад туулсан юм. Булган аймгийн Тэшиг сумын ЕБС-ийн 11-р ангийн сурагч Т.Өсөх-Ирээдүйгийн хувьд өсвөрийн УАШТ-ээс 13 алт, хүүхдийн спортын наадмаас гурван алтан медаль хүртсэн, цанын спортын ирээдүй болсон шилдэг залуу тамирчин юм.

          Манай нөгөө тамирчин А.Хүслэнгийн хувьд 22:01.7 минутын үзүүлэлтээр 42-р байрт орлоо. Манай цаначид хоёрдугаар сарын 1-ний өдөр буюу наадмын сүүлийн өдөр 4х5 км-ийн холимог буухиа уралдаанд өрсөлдөх болно.