Японы мэргэжлийн сүмо бөхийн хацү башё өнөөдөр өндөрлөлөө. Тус башёд ёкозүна Тэрүнофүжи Г.Ган-Эрдэнэ 13 даваа, хоёр унаатайгаар түрүүллээ. Тэрбээр өнөөдөр озеки Киришима Б.Лхагвасүрэнг давснаар сэкиваке Котоновакатай нэмэлт барилдаан хийж, ялснаар Япон Улсын эзэн хааны цомыг ес дэх удаагаа гардан авлаа.

      Түрүү бөх ёкозүна Тэрүнофүжи өнгөрсөн арванхоёрдугаар сарын 28-ны өдөр Монгол Улсын Ерөнхийлөгч Ухнаагийн Хүрэлсүхийн зарлигаар Монгол Улсын гавьяат тамирчин цол хүртсэн билээ. Бусад монгол бөхчүүдийн тухайд, озеки Хошёорюү С.Бямбасүрэн (11:4), Киришима Б.Лхагвасүрэн (11:4), Тамаваши Б.Мөнх-Оргил (8:7) даваатай башёг өндөрлүүлж байна.