Туялзуур сэлэмний залуучуудын ес дэх удаагийн УАШТ-ий ганцаарчилсан төрлийн медальтнууд тодорлоо. Эмэгтэйчүүдийн төрөлд "Дуэль" клубийн тамирчин Н.Ялгуун түрүүлж, өнгөрсөн жилийн амжилтаа бататгав. Тэрбээр өмнө нь өсвөрийн УАШТ-д мөн түрүүлж, насанд хүрэгчдийн УАШТ-ээс багийн төрлөөр хүрэл медаль хүртэж байсан билээ.

       Н.Ялгуун финалын тулаанд нэг багийн Б.Бүлтэнг эхнээсээ давамгайлсаар 15:8-аар ялалт байгуулсан. Харин эрэгтэйчүүдийн шигшээ тоглолт тун өрсөлдөөнтэй өрнөлөө. "UB fencing" клубийн Э.Тэмүүлэн финалд 1:6, 8:13 гэх зэргээр хожигдож явсан ч оноог бага багаар нөхсөөр цаг дуусахаас долоон секундын өмнө 13:14-өөр болгон ойртуулсан.

       Ингээд сүүлийн шийдвэрлэх довтолгоогоо хийхэд хоёр тамирчин зэрэг оноо авснаар 14:15 болж, "Дуэль" клубийн Х.Ананд ялалт байгуулж, алтан медалийн эзэн боллоо. Тэрбээр өмнө нь өсвөрийн улсын аваргаас хоёр хүрэл медаль хүртээд байсан бол залуучуудын УАШТ-ий анхны медалиа ийнхүү алтаар эхлүүлсэн юм.

Ганцаарчилсан тэмцээний дүн

Эрэгтэй:

1.Х.Ананд (Дуэль)

2.Э.Тэмүүлэн (UB fencing)

3.Б.Гандөл (Дуэль)

3.Б.Батням (Дуэль)

Эмэгтэй:

1.Н.Ялгуун (Дуэль)

2.Б.Бүлтэн (Дуэль)

3.Э.Энхжин (Дуэль)

3.Т.Амин-Эрдэнэ (Дуэль)