Ази тивд анх удаагаа зохион байгуулагдаж буй "Канвон 2024" залуучуудын өвлийн олимпын наадмын бамбар  асаж, тив тивийн шилдэг залуу тамирчид олимпын наадмын тэнгэр дор хуран цугларлаа. Энэхүү дөрөв дэх удаагийн олимпын наадамд Монгол Улсын баг тамирчид хамгийн өргөн бүрэлдэхүүнтэй буюу 12 тамирчин, гурван дасгалжуулагч багш нар багийн ахлагч Б.Баттцэцэгийн удирдлага дор оролцож байгаа юм.

          ОУОХ-ны “Хүндэт гишүүн” Ш.Магван, ОУОХ-ны гишүүн Б.Баттүшиг нар ОУОХ-ны урилгаар, Монголын цана болон биатлоны холбооны удирдлагууд, эцэг эхийн төлөөлөл баг тамирчдаа дэмжихээр хүрэлцэн очсон байна.

       Өчигдрийн байдлаар 80 орны 1950 тамирчин, дасгалжуулагчид Канвон болон Жёонсон мужийн тамирчдын хотхонд байрлаад байгаа талаар Зохион байгуулах хорооноос мэдээллээ. "Канвон 2024" Залуучуудын IV өвлийн олимпын наадамд Монгол Улсаа төлөөлөн оролцох баг тамирчдын хувцас үнэхээр гоё харагдаж байлаа.

            Олимпын наадамд 80 орны 1900 гаруй тамирчин спортын 15 төрөлд 81 багц медалийн төлөө өрсөлдөх юм. Тэдний дунд Монгол Улсын 12 тамирчин бий. Манай улсаас уулын цанын төрөлд анх удаа хоёр тамирчин оролцох бол гүйлтийн цанын төрөлд дөрөв, биатлоны төрөлд зургаан тамирчин тус тус өрсөлдөнө. Нээлтийн ёслолд Монгол Улсын тугийг уулын цанын тамирчин М.Манлайжав, биатлоны тамирчин Д.Нямсүрэн нар хамтдаа барин жагсав.