Энэ оны анхны олимп болох "GANGWON 2024" залуучуудын өвлийн IV олимпын наадам өнөөдөр нээлтээ хийхэд бэлэн болжээ. Өмнөд Солонгосын ард иргэд гурав дахь олимп болон анхны залуучуудын олимпын наадмыг зохион байгуулах бүхий л бэлтгэлийг хангасан байна.

        "Пёнчан 2018" өвлийн олимпын наадмын байгууламжид болж буй залуучуудын олимпын наадмын бэлтгэл ажил бүрэн хангагдаж, Олон улсын олимпын хорооны ерөнхийлөгч болон орон орны хүндэт зочид ирсээр байна.

         Тамирчдын тосгон болох далайн эргийн Каннин хот дахь Gangneung village-д 80 орны 1900 тамирчин болон орон орны Олимпын хорооны төлөөлөгчид байрлаж эхэлсэн. Олон улсын олимпын хорооны Ерөнхийлөгч Томас Бах, "Gangwon 2024" залуучуудын олимпыг зохион байгуулах хорооны ерөнхийлөгч болон алдарт аваргууд өчигдөр залуустай уулзалт зохион байгууллаа.

         Тив тивийн залуусын төлөөлөл болсон тамирчдын тосгон дахь арга хэмжээнд Монголын гүйлтийн цанын дасгалжуулагч Д.Баттулга, тамирчин А.Хүслэн, Т.Өсөх-Ирээдүй, Ж.Уянгаа, Н.Нандинцэцэг нар оролцсон байна. Олон улсын олимпын хорооны ерөнхийлөгч Томас Бах тив тивийн залууст мөрөөдлийнхөө төлөө үеийнхээсээ ялгаран шалгарч энд хүрэлцэн ирсэнд талархал илэрхийлж, олимпизмын үйл хэргийг танилцуулсан юм.

        БНСУ-д болж буй олимпын наадамд эрхээ аван оролцож байгаа залуусыг тав тухтай байж, хүссэн амжилтаа гаргахыг зохион байгуулах хорооны ерөнхийлөгч, олимпын гурван удаагийн аварга, буудлагын тамирчин Жин Жунү хэллээ. Энэ уулзалтын үеэр мөн өвлийн спортоор олимпын аварга болж байсан алдарт тамирчин болон соёл урлагийн төлөөлөл болсон алдартнууд залууст үнэтэй зөвөлгөө өгсөн юм.