Монголын боксын холбооны удирдлагууд 2024 онд зохиогдох үндэсний болон олон улсын арга хэмжээний хуваариа эцэслэн гаргасан байна. Дархан хотод 2006, 2007 онд төрсөн боксчид оролцох залуучуудын УАШТ-ийг гуравдугаар сарын 31-ээс дөрөвдүгээр сарын 6-ны өдрүүдэд явуулна. Үүний дараагаар 2008, 2009 онд төрсөн тамирчдын Монгол Улсын аварга шалгаруулах тэмцээн дөрөвдүгээр сарын 21-27-ны өдрүүдэд болох юм.

        Энэ жил Монгол Улсын тэмцээний календарьт шинээр нэмэгдсэн нь олимпын хүрэл медальт, 2014 оны Азийн наадмын түрүү  Доржнямбуугийн Отгондалайгийн нэрэмжит тэмцээн юм. Энэхүү тэмцээн Дорнод аймагт тавдугаар сарын 7-12-ны хооронд болно.

        Сурагч охидын улсын аварга шалгаруулах тэмцээн нийслэл Улаанбаатар хотноо зургадугаар сарын 3-9-ний өдрүүдэд зохион байгуулагдана. Энэ тэмцээнд 11-12 настай охид оролцох юм. Харин 13-14 настай өсвөр үеийн охид, хөвгүүдийн УАШТ хамт болно.

        “Дорноговийн цом”  өсвөрийн боксчдын тэмцээн аравдугаар сарын 23-27-ны өдрүүдэд болно. Мөн өсвөр үеийн уламжлалт “Өлгий цом” олон улсын бокс тэмцээн мөн 2024 оны албан ёсны календарт багтсан байна.