Чөлөөт бөхийн 2024 оны УАШТ-ий 57 кг-ын жинд “Хилчин” спорт хорооны тамирчин, ДАШТ-ий хүрэл медальт З.Занабазар, “Төгс” дэвжээний залуу бөх “U23” хүртэлх насны ДАШТ-ий хүрэл медальт Б.Мөнх-Эрдэнэ нар үзүүрт шалгарч, алтан медалийн төлөө барилдлаа.

       Б.Мөнх-Эрдэнэ нэг минут дутуу байхад өрсөлдөгчөө даралтад оруулсан ч, З.Занабазар хүнд нөхцөлөөс амархан гарсан. Гэвч Б.Мөнх-Эрдэнэ хий зайгүй, нягт барилдаж 7:3-аар ялснаар насанд хүрэгчдийн УАШТ-д түрүүллээ.

      Азийн наадмын хүрэл медальт, ОУХМ  Н.Насанбуян, “U23” хүртэлх насны Азийн аваргын хүрэл медальт ОУХМ М.Даваабанди нар энэ жинд хүрэл медаль хүртсэн юм. М.Даваабанди оноогоор хожигдож яваад дөрвөн секунд дутуу байх үед өрсөлдөгчөө түрж гаргаснаар хүрэл медалийг хүртсэн УАШТ-ий шилдэг барилдаануудын нэг гарцаагүй мөн байлаа.