Улаанбаатарын өвлийн наадмыг энэ сарын 27-28-ны өдрүүдэд зохион байгуулахаар болжээ. Наадамд Улаанбаатар хот болон 21 аймгийн 1000 гаруй тамирчнаас гадна Хятадын Өвөр Монгол, Шинжаан Уйгур, ОХУ-ын Буриад зэрэг монгол туургатны 80 гаруй гадаад тамирчин оролцох юм байна.

          Наадмын үеэр мөсөн сурын харвааны улсын аварга шалгаруулах тэмцээн, сонирхогчийн тэмцээн, мөсний шагайн улсын аварга шалгаруулах тэмцээн, сонирхогчийн тэмцээн болно.

        Мөн снөүбоардын тэмцээн, параглайдингийн /уулын шүхэр/ хотын аварга шалгаруулах тэмцээн, цасны регбигийн хотын аварга шалгаруулах тэмцээн явагдана. Үүнээс гадна мөсөн хананд авиралтын сонирхогчийн тэмцээн, гэр бүлийн буухиа, олс таталтын тэмцээн зохион байгуулна. 

         Түүнчлэн шүхэр, шувуулахуй, снөүбоардын үзүүлэх тоглолт болох юм. Наадмыг “Скайрезорт” цанын бааз болон Цонжин болдогт байрлах “Уухайн” дуу жуулчны баазад зохион байгуулна.