Чөлөөт бөхийн УАШТ-ий хоёр дахь өдөр эрэгтэй зургаа, эмэгтэй долоон жингийн сонирхолтой барилдаанууд өрнөх болно. Тухайлбал, эмэгтэйчүүдийн 53, 59, 68, эрэгтэйчүүдийн 57, 70, 97 кг-ын медальтнууд тодроно.

      Мөн эмэгтэй 50, 55, 65, 76 кг, эрэгтэй 61, 86, 125 кг-ын урьдчилсан болон хагас шигшээ барилдаан явагдах юм. Хамгийн хүнд жин 125 кг-ын жинд хамгийн олон буюу 33 бөх барилдана. ДАШТ-ий мөнгө, хүрэл медальт, олимпын шагналт байрын эзэн М.Лхагвагэрэл тэднийг ахалж барилдах юм.

       Түүнчлэн Азийн аваргын дөрвөн медальтай О.Үйтүмэн, уран барилдаант улсын харцага Ш.Пүрэвгарьд зэрэг хүчтэй өрсөлдөгчид бий. Мөн олимпын жин болох 86 кг-д залуучуудын ДАШТ-ий хүрэл медальт Б.Бат-Эрдэнэ, “U23” хүртэлх насны Азийн аварга Н.Батбилгүүн тэргүүтэй 18 бөх барилдана.

       Өнгөрсөн жил энэ жинд Б.Бат-Эрдэнэ түрүүлж байв.Олимпын жин болох эмэгтэйчүүдийн 50 кг-ын жинд  Д.Отгонжаргал зодоглоогүй ч өрсөлдөөн ширүүн өрнөх төлөвтэй. Энэ жинд “Токио-2020” олимпын V байрын шагналт, “U23” хүртэлх насны Азийн аварга, “U23” хүртэлх насны ДАШТ-ий хүрэл медальт Ц.Намуунцэцэг, цэргийн ДАШТ-ий мөнгөн медальт Г.Оюундарь, өсвөр, залуучуудын ДАШТ-ий хүрэл медальт, цэргийн дэлхийн аварга М.Мөнхгэрэл зэрэг шилдэг бөхчүүд барилдах болно.

Өнөөдөр болох финалын барилдаанууд:

Б.Болортуяа-Б.Хулан (эмэгтэй 53 кг)

Б.Анударь-Б.Болор-Эрдэнэ (эмэгтэй 59 кг)

П.Номин-Эрдэнэ-Э.Одзаяа (эмэгтэй 68 кг)

З.Занабазар-Б.Мөнх-Эрдэнэ (эрэгтэй 57 кг)

Э.Тэмүүлэн-Ц.Чинзориг (эрэгтэй 70 кг)

Г.Ганхуяг-Ө.Батзул (эрэгтэй 97 кг)

Урьдчилсан шатны барилдаан 11:00 цагаас, тэмцээний нээлт 16:30 цагаас, хагас шигшээ болон медалийн төлөөх барилдаанууд 17:30 цагаас эхлэх болно.