Дэлхийн чансааны оноо олгох цувралын "Zagreb Open 2024" тэмцээний хоёр дахь өдрийн финалын барилдаанууд боллоо. Эмэгтэйчүүдийн 50 кг-ын жингийн хүрэл медалийн төлөөх барилдаанд манай бөх, ДАШТ-ий хоёр мөнгө, нэг хүрэл медальт МУГТ Долгоржавын Отгонжаргал барилдав.

           Тэрбээр  хагас шигшээд өнгөрсөн оны ДАШТ-ийн хүрэл медальт Фен Зикид 12:2 оноогоор цэвэр ялагдаж хүрэл медалийн төлөө өрсөлдөхөөр болсон юм. Хүрэл медалийн төлөөх барилдаанд Польш Улсын тамирчин Агата Марта Валерзакийг оноогоор цэвэр ялж шагналын тавцанд зогссон байна.

      Ингэснээр манай тамирчин Д.Отгонжаргал "Zagreb Open" тэмцээнд хоёр дахь удаагаа оролцож анх удаагаа медаль хүртэж байгаа юм. Харин өнөөдөр эмэгтэйчүүдийн 68 кг-ын жинд манайхаас барилдах сүүлийн тамирчин буюу ДАШТ-ий мөнгөн медальт ОУХМ Э.Дэлгэрмаа зодоглоно.