Монгол Улсын гавьяат дасгалжуулагч, МҮОХ-ын дэд ерөнхийлөгч Чойжгаваагийн Наранбаатар 1954 оны энэ өдөр мэндэлжээ.  Гавьяат дасгалжуулагч Ч.Наранбаатар Монголын спортын салбарт үнэтэй хувь нэмэр оруулж яваа, спортын нэрт зүтгэлтэн юм. Түүнийг БТСУХ-ны даргаар ажиллаж байхад Монгол Улсын анхны олимпын хоёр аварга нэгэн зэрэг төрж, паралимпаас анхны алтан медалийг хүртэж, Монголчууд 2008 оны олимпын наадмаас хос алт, хос мөнгөн медаль хүртэж байсан билээ.

         Тэрбээр нийслэлийн 5-р дунд сургууль, Монгол Улсын багшийн их сургууль, Германы залуучуудын дээд курсийг дүүргэсэн. 1975 онд хөнгөн атлетикийн өндрийн харайлтын төрлөөр Монгол Улсын спортын мастер, 1997 онд Боловсрол судлалын магистрын зэрэг, 2012 онд сурган хүмүүжүүлэх ухааны доктор /Ph.D/ цол, зэргийг хамгаалсан байдаг.

          Ч.Наранбаатар гавьяат Монголын мастеруудын биеийн тамир, спортын хорооны ерөнхийлөгч, 2002-2005 онуудад Нийслэлийн Биеийн тамир, спортын хорооны дарга, 2005-2012 онуудад Засгийн газрын хэрэгжүүлэгч агентлаг Биеийн тамир, спортын газрын даргаар тус тус ажилласан. Одоо тэрбээр МҮОХ-ны дэд ерөнхийлөгчөөр ажиллаж байгаа юм.