Монголын спортын салбарын шилдгүүд тодруулах, Монголын үндэсний олимпын хороо "Бөртэ чоно 2023" тэргүүн дээд шагнал гардуулах ёслолын ажиллагааг 2023 оны арванхоёрдугаар сарын 18-ны өдрийн 17:00 цагт “Корпорэйт” зочид буудлын концертын их танхимд боллоо.

“ШИЛДГИЙН ШИЛДЭГ ТАМИРЧИН”, ШИЛЖИН ЯВАХ ЦОМЫН ЭЗЭН  БААТАРХУЯГИЙН ОТГОНБОЛД

    2023 оны Монголын спортын  “Шилдгийн шилдэг тамирчин”, шилжин явах цомын эзнээр байт харвааны тамирчин, ОУХМ Баатархуягийн Отгонболд шалгарлаа.

     Б.Отгонболд энэ онд “Ханжоу 2022” Азийн зуны спортын XIX наадмын аварга, "Парис 2024" олимпын наадамд оролцох эрх хүртсэн, Гавьяатуудын нэрэмжит олон улсын тэмцээний хүрэл медаль хүртсэн амжилтуудыг үзүүлж, спортын сэтгүүлчдийн санал хураалтаас хамгийн өндөр буюу 58 оноо хүртжээ.

“ШИЛДЭГ ТАМИРЧИН”-аар  ЁНДОНПЭРЭНЛЭЙН БАСХҮҮ /ЖҮДО/

          Жүдо бөхийн тамирчин, ОУХМ Ёндонпэрэнлэйн Басхүү "Бөртэ Чоно 2023" оны шилдэг тамирчин”-аар тодорлоо. Тэрбээр энэ онд “Ханжоу 2022” Азийн зуны спортын XIX наадмын мөнгөн медаль, Дэлхийн аварга шалгаруулах тэмцээний хүрэл медаль, "Улаанбаатар их дуулга 2023" алтан медаль, "Тбилиси их дуулга 2023" мөнгөн медаль, "Токио их дуулга 2023" мөнгөн медаль хүртсэн амжилтыг үзүүлж, спортын сэтгүүлчдийн санал хураалтаас 43 оноо хүртсэн байна.

“ШИЛДЭГ ТАМИРЧИН”-аар  ЭНХСАЙХАНЫ ДЭЛГЭРМАА /ЧӨЛӨӨТ БӨХ/

            Чөлөөт бөхийн тамирчин, ОУХМ Энхсайханы Дэлгэрмаа спортын сэтгүүлчдийн санал хураалтаас 50 оноо хүртэж “Бөртэ Чоно” наадмын “Шилдэг эмэгтэй тамирчин”-аар тодорлоо. Тэрбээр энэ онд дэлхийн аварга шалгаруулах тэмцээнээс мөнгөн медаль, "Ханжоу 2022" Азийн наадмаас хүрэл медаль, дэлхийн чансааны тэмцээнээс хүрэл медаль, "Парис 2024" олимпын наадамд оролцох эрхээ хүртсэн амжилт үзүүлсэн билээ.

“ШИЛДЭГ СПОРТЫН ХОЛБОО”–оор  МОНГОЛЫН ГИМНАСТИКИЙН ХОЛБОО

         Монголын гимнастикийн холбоо нь энэ онд олон улсын тэмцээнд баг тамирчдаа амжилттай хамруулж, МҮОХ үйл ажиллагааны оролцооны идэвх, санхүү менежментийн ил тод байдлаар түлхүү өндөр оноо хүртэж, 1400 онооноос 1035 оноо авсанаар шилдэг спортын холбоогоор шалгарлаа.

“ШИЛДЭГ ТАМИРЧИН”-аар САЙНБАЯРЫН ЖАМБАЛЖАМЦ /ДУГУЙ/

       Дугуйн спортын тамирчин, ОУХМ Сайнбаярын Жамбалжамц “Ханжоу 2022” Азийн зуны спортын XIX наадмын хүрэл медаль, Азийн аварга шалгаруулах тэмцээний хүрэл медаль, Испани Улсын "BURGOS BH" мэргэжлийн багтай гэрээ байгуулсан, “Парис 2024” олимпын наадамд оролцох эрхээ хүртсэн амжилтаар, спортын сэтгүүлчдийн санал хураалтад нийт 38 оноо хүртэж "Бөртэ Чоно"-ын эзэн боллоо.

          “ШИЛДГИЙН ШИЛДЭГ ЭМЭГТЭЙ ТАМИРЧИН”-аар Долгоржавын ОТГОНЖАРГАЛ /чөлөөт бөх/

     Монгол Улсын гавьяат тамирчин Долгоржавын Отгонжаргал дэлхийн аварга шалгаруулах тэмцээний мөнгөн медаль, "Парис 2024" олимпын наадамд оролцох эрх хүртсэн, дэлхийн чансааны Унгарын гран при тэмцээнээс хүрэл медаль хүртсэн амжилтаар, спортын сэтгүүлчдээс 55 оноо хүртэж, энэ оны “Шилдгийн шилдэг эмэгтэй тамирчин”-аар шалгарлаа.

“ОНЫ ШИЛДЭГ ТАМИРЧИН”-аар ЛУТСАЙХАНЫ АЛТАНЦЭЦЭГ /БОКС/

              Лутсайханы Алтанцэцэг дэлхийн аварга шалгаруулах тэмцээнээс мөнгөн медаль хүртсэн амжилтаар Монголын спортын сэтгүүлчдээс 21 оноо хүртэж, энэ оны шилдэг эмэгтэй тамирчнаас шалгарлаа.

“ШИЛДЭГ ДАСГАЛЖУУЛАГЧ”-аар ТҮМЭНДЭМБЭРЭЛИЙН СҮХБААТАР /ЧӨЛӨӨТ БӨХ/

              "Бөртэ Чоно 2023" оны шилдэг дасгалжуулагчаар Монгол Улсын гавьяат дасгалжуулагч Түмэндэмбэрэлийн Сүхбаатар шалгарлаа.

“ШИЛДЭГ БАГ”-аар  3Х3 САГСАН БӨМБӨГИЙН ҮНДЭСНИЙ ЭРЭГТЭЙ ШИГШЭЭ БАГ

           “Бөртэ Чоно 2023” наадмын “Оны шилдэг баг”-аар 3х3 сагсан бөмбөгийн Үндэсний шигшээ эрэгтэй шигшээ баг Азийн аварга шалгаруулах тэмцээний алт, "Шанхай их дуулга" тэмцээний аварга, “FIBA Ulaanbaatar Challenger” тэмцээний мөнгөн медаль, "FIBA Suntory Shanghai Challenger" тэмцээний мөнгөн медаль, "FIBA Wuxi Challenger" тэмцээний мөнгөн медаль, "FIBA Ulaanbaatar Super Quest" тэмцээний хүрэл медаль хүртсэн амжилтаар тодорлоо.

“ПАРАЛИМПЫН ШИЛДЭГ ТАМИРЧИН”-аар ГАНБОЛДЫН БОЛОР-ЭРДЭНЭ

        Энэ оны “Паралимпын шилдэг тамирчин”-аар дэлхийн паратаэквондогийн дэлхийн аварга шалгаруулах тэмцээний хүрэл медаль, "Ханжоу 2022" Пара Азийн наадмын аварга, 2023-2024 оны Пара гран при тэмцээнээс хоёр алт, хоёр мөнгө тус тус хүртсэн амжилтаар Ганболдын Болор-Эрдэнэ шалгарлаа.

“ШИЛДЭГ ЗАЛУУ ТАМИРЧИН”-аар ОЮУН-ЭРДЭНИЙН ЭНХСАЙХАН /БОКС/

          "Бөртэ Чоно 2023" наадмын “Шилддэг залуу тамирчин”-аар Оюун-Эрдэнэ Энхсайхан шалгарав. Тэрбээр "Улаанбаатар 2023" Зүүн Азийн залуучуудын наадмын аварга, залуучуудын улсын аварга, Казахстан Улсын Шымкент хотод зохиогдсон залуучуудын олон улсын тэмцээний аварга болсон амжилтаар шалгарлаа.

“ШИЛДЭГ ДАСГАЛЖУУЛАГЧ”-аар  АРСЛАНГИЙН МЭРГЭН

         Энэ оны “Шилдэг дасгалжуулагч”-аар Монголын хоккейн шигшээ багийн ахлах дасгалжуулагч Арслангийн Мэргэн тодорч, "Бөртэ Чоно"-ын эзэн боллоо.

“ШИЛДЭГ ШҮҮГЧ”-ээр БАТТУЛГЫН АЛТАНГАДАС /Чөлөөт бөх/

     “Бөртэ Чоно 2023” наадмын “Шилдэг шүүгч”-ээр Баттулгын Алтангадас тодорлоо. Тэрбээр “Ханжоу 2022” Азийн 19 дүгээр наадам, Азийн аварга шалгаруулах тэмцээн, "Улаанбаатар 2023" Зүүн Азийн залуучуудын наадам, “U23” дэлхийн аваргыг амжилттай дэнсэлсэн билээ.

“ШИЛДЭГ ШҮҮГЧ”-ээр Ө.БАТЦЭЦЭГ /ХӨЛ БӨМБӨГ/

      Хөл бөмбөгийн олон улсын шүүгч Ө.Батцэцэг Бөртэ Чоно”-ын эзнээр шалгарлаа. Тэрбээр “Ханжоу 2022” Азийн 19 дүгээр наадам, Азийн аварга шалгаруулах тэмцээн, Зүүн азийн залуучуудын наадам, “U23” дэлхийн аварга шалгаруулах тэмцээнийг амжилттай шүүн явуулсан билээ.

“ШИЛДЭГ СПОРТЫН ХОЛБОО” – МОНГОЛЫН ЖҮДО БӨХИЙН ХОЛБОО

        Монголын жүдо бөхийн холбоо энэ оны “Шилдэг спортын холбоо”-оор шалгарч, “Бөртэ Чоно”-ын эзэн боллоо. Байгууллагын хөгжил, спортын хөгжил, хүний хөгжил, санхүү, маркетингийн хөгжил, МҮОХ-ны үйл ажиллагааны оролцоо, спортын амжилт зэрэг нэгдсэн дүнгээр Монголын жүдо бөхийн холбоо 1400 онооноос 1145 оноо авч оны “Шилдгийн шилдэг” олимпын төрлийн холбоогоор шалгарлаа.

“ШИЛДЭГ СПОРТЫН ХОЛБОО”–оор  МОНГОЛЫН КРИКЕТИЙН ХОЛБОО

          Монголын крикетийн холбоо нь эрчимтэй үйл ажиллагааны менежментэд өндөр оноо хүртсэн бөгөөд, "Ханжоу 2022" Азийн зуны спортын наадамд анх удаа эрэгтэй, эмэгтэй багийн бүрэн бүрэлдэхүүнтэйгээр оролцсон билээ. Түүнчлэн тамирчдын комисс, жендерийн комиссыг байгуулж манлайлан ажилласан төдийгүй, санхүү маркетингийн хөгжлөөр шилдэг байж нийт 1400 онооноос 860 оноо авч “Шилдэг спортын холбоо”-оор шалгарлаа.

2023 ОНЫ “ОНЦЛОХ БӨРТЭ ЧОНО”-оор  "УЛААНБААТАР 2023" ЗҮҮН АЗИЙН ЗАЛУУЧУУДЫН НААДМЫГ ЗОХИОН БАЙГУУЛАХ ХОРОО

    Энэ оны “Онцлох Бөртэ Чоно цомын эзэн”-ээр "Улаанбаатар 2023" Зүүн Азийн залуучуудын наадмын зохион байгуулах хороо тодорлоо. Энэ онд Монгол Улс түүхэндээ анх удаа 11 үндэсний олимпын хороодын 800 гаруй тамирчид 12 спортын төрлөөр өрсөлдсөн Зүүн Азийн Залуучуудын наадмыг эх орондоо амжилттай зохион байгуулсан билээ.

“СПОРТЫН ШИЛДЭГ ИВЭЭН ТЭТГЭГЧ БАЙГУУЛЛАГА”–аар  СПОРТЫН 361 БРЭНД

       Спорт, олимпизмыг тууштай дэмжин ажиллаж буй  “Спортын 361 брэнд” нь спортын “Шилдэг ивээн тэтгэгч”-ээр тодорч, “Бөртэ чоно”-ын эзэн боллоо. 361 брэндээс энэ онд “Ханжоу 2022” Азийн зуны спортын XIX наадам, “Улаанбаатар 2023” Зүүн Азийн залуучуудын наадамд оролцсон Монголын баг тамирчдыг гурван тэрбум гаруй төгрөгийн өртөг бүхий 1390 сэт хувцсаар бүрэн ивээн тэтгэсэн билээ.

“СПОРТЫН ШИЛДЭГ ИВЭЭН ТЭТГЭГЧ БАЙГУУЛЛАГА” – EMART /Скай хайпермаркет ХХК/

    Спорт, олимпизмыг тууштай дэмжин ажиллаж буй “Emart - Скай хайпермаркет” ХХК  “Спортын шилдэг ивээн тэтгэгч”-ээр тодорч, “Бөртэ чоно”-ын эзэн боллоо.

“СПОРТЫН ШИЛДЭГ БҮТЭЭН БАЙГУУЛАЛТ”–аар  “AIRDOM” ТӨСӨЛ /МОНГОЛЫН ХӨЛ БӨМБӨГИЙН ХОЛБОО/

    Дэлхийн стандартад нийцсэн жилийн дөрвөн улиралд бэлтгэл хийх боломжтой, Ази тивийн анхны цор ганц битүү хучилттай хөл бөмбөгийн талбайг Төв аймгийн Зуун мод хотод Монголын хөл бөмбөгийн холбооноос бүтээн байгуулсан билээ.

“AIRDOM” төсөл амжилттай хэрэгжиж битүү хучилттай талбай байгуулагдсанаар баг тамирчдын амжилт, бэлтгэлийн үр дүнд эерэгээр нөлөөлөх томоохон хүчин зүйл болж чадсан байна.

“СПОРТЫН ШИЛДЭГ СЭТГҮҮЛЧ”–ээр  ОТГОНБАЯРЫН СОНИНБАЯР

    “Спортын шилдэг сэтгүүлч”-ээр МҮОНТ-ийн сэтгүүлч Отгонбаярын Сонинбаяр тодорлоо.Тэрбээр “Ханжоу 2022” Азийн зуны спортын XIX наадмыг амжилттай сурвалжилсан төдийгүй, волейбол болон хөл бөмбөгийн үндэсний лигийн тэмцээний шууд нэвтрүүлгийн редакторын ажлыг амжилттай зохион явуулжээ.

“ШИЛДЭГ ОЛИМПЫН ЗҮТГЭЛТЭН” – КАВАУЧИ ШИРО

    2023 оны “Шилдэг  олимпын зүтгэлтэн”-ээр Япон Улсын иргэн, Монгол Улсын өргөмжит консул, МҮОХ-ны элч төлөөлөгч Каваучи Широ шалгарлаа. Тэрбээр МҮОХ-ны үйл ажиллагаа болон бэйсбол-софтбол, бокс, жүдо бөхийн баг тамирчдыг бүхий л талаар дэмжин ажилласан билээ. Мөн шинэлэг спорт болох тийболын төрлийг хүүхэд багачуудад сурталчлан хөгжүүлэх ажлыг амжилттай өрнүүлж байна. “Олимпын зүтгэлтэн” Каваучи Широ нь энэ онд Монгол Улсын спорт, олимпизмын хөгжилд нийт 300 гаруй сая төгрөгийн буцалтгүй тусламжийг үзүүлсэн байна.

“ШИЛДЭГ ОЛИМПЫН ЗӨВЛӨЛ” –өөр ТӨВ АЙМГИЙН "СӨҮЛ" ОЛИМПЫН ЗӨВЛӨЛ

    Төв аймгийн “Сөүл” олимпын зөвлөл нь 2023 онд хүүхэд залууст олимпизмын үзэл санааг түгээн дэлгэрүүлэх олон талт үйл ажиллагааг амжилттай өрнүүлж, аймгийн ЗГТГ, БТСГ, Боловсрол шинжлэх ухааны газар, ерөнхий боловсролын сургуулиудтай нягт хамтран ажилласан билээ. Мөн энэ оны “Олимпын боловсрол ба бие бялдрын хүмүүжил” сэдэвт Болзолт уралдаан амжилттай оролцож, шилдэг Олимпын зөвлөлөөр шалгарсан бөгөөд аймгийн хэмжээнд Олимпизмын үзэл санааг түгээн дэлгэрүүлэх ажлыг тууштай олон жил өрнүүлж байна.

“ШИЛДЭГ ОЛИМПЫН ТАНХИМ” –аар НИЙСЛЭЛИЙН ЕРӨНХИЙ БОЛОВСРОЛЫН 70 ДУГААР СУРГУУЛИЙН ОЛИМПЫН ТАНХИМ

      Энэ оны “Шилдэг олимпын танхим”-аар Нийслэлийн ерөнхий боловсролын 70 дугаар сургуулийн олимпын танхим тодорлоо. 70 дугаар сургуулийн олимпын танхим нь боловсролын тусгай хэрэгцээ шаардлагатай суралцагчдад олимпизмын үзэл санааг 2005 оноос хойш тууштай түгээн дэлгэрүүлж, энэ оны “Олимпын боловсрол ба бие бялдрын хүмүүжил” сэдэвт болзолт уралдаанд амжилттай оролцон улсын тэргүүний сургууль, олимпын танхимаар шалгарсан билээ. Мөн үйл ажиллагаандаа “AR”, “VR” технологийг нэвтрүүлсэн төдийгүй олимпын боловсрол, хүмүүжил, тэмцээн уралдаан, танин мэдэхүйн чиглэлээр 30 гаруй багц ажлыг амжилттай хэрэгжүүлжээ.