Монголын чөлөөт бөхийн холбооны Ээлжит бус их хурал 2023 оны арванхоёрдугаар сарын 7-ны өдөр амжилттай хуралдсан билээ. Энэхүү ээлжит бус их хурлаар МЧБХ-ны ерөнхийлөгч батламжилсан. Шинэчилсэн дүрмийн найруулга, бусад асуудлуудыг хэлэлцсэн юм.

      Тус хурлын дараагаас Монголын чөлөөт бөхийн холбооны тамирчдын оролцох УАШТ болон ДБНХ-ны  2024 оны календарьчилсан төлөвлөгөөнд багтсан олон улсын чанартай тэмцээнүүдийн товыг баталсан байна. Ирэх 2024 оны нэгдүгээр сарын 11-14-ний өдрүүдэд насанд хүрэгчдийн УАШТ Улаанбаатар хотод болно. Хоёрдугаар сарын 22-25-ны өдрүүдэд “U23” насны ангиллын УАШТ болох юм.

        Харин “U17” насны ангиллын УАШТ-ийг гуравдугаар сарын 21-24-ний өдрүүдэд Орхон аймгийн Эрдэнэт хотод зохион явуулна. “U15” насны ангиллын УАШТ-ийг дөрөвдүгээр сарын 18-21-ний өдрүүдэд Өмнөговь аймагт хийхээр болжээ. “U20” насны ангиллын УАШТ-ийг Төв аймагт зохион явуулахаар болсон байна.

        Дэлхийн бөхийн нэгдсэн холбоо, “UWW”-ийн календарьчилсан төлөвлөгөөнд орсон тэмцээний хуваарь гарсан байгаа. Тус хуваарьт орсон тэмцээнүүдэд МЧБХ-ны Үндэсний шигшээ багийн тамирчдын оролцох тэмцээнүүд тодорхой болжээ. 2024 оны нэгдүгээр сарын 10-14-ний өдрүүдэд Хорват Улсын Загреб хотод “Zagreb open” дэлхийн чансааны тэмцээн болох юм.

       Нэгдүгээр сарын 19-21-ний өдрүүдэд Франц Улсын Ницц хотод “De Frabce Henri Deglane” гран при, гуравдугаар сарын 7-10-ны өдрүүдэд Туркийн Анталья хотод “Yasar Dogu” нэрэмжит тэмцээн, дөрөвдүгээр сарын 11-16-ны өдрүүдэд Киргизстаны Бишкек хотод Ази тивийн аварга шалгаруулах тэмцээн, Азийн аваргын дараа дөрөвдүгээр сарын 19-21-ний өдрүүдэд Киргизстаны Бишкек хотод Ази тивийн олимпын эрх олгох тэмцээн болно.

         Харин тавдугаар сарын 9-12-ны өдрүүдэд Туркийн Истанбул хотод  дэлхийн олимпын эрх олгох тэмцээн явагдана. Зургадугаар сарын 6-9-ний өдрүүдэд Унгар Улсын Будапешт хотод дэлхийн чансааны тэмцээн, зургадугаар сарын 20-24-ний өдрүүдэд Польш Улсын Варшав хотод “Ziolkowski Pytlasinski” нэрэмжит  Польшийн нээлттэй тэмцээн, долдугаар сарын 5-7-ны өдрүүдэд Испани Улсын Мадрид хотод  гран при тэмцээн, наймдугаар сарын 5-11-ний өдрүүдэд Франц Улсын Парис хотод олимпын наадмын чөлөөт бөхийн тэмцээн тус тус болох хуваарь гарсан байна.