Хэвшмэл ойлголтыг эвдэж, хэний ч санаанд оромгүй хэрнээ таныг загварлаг харагдуулах хувцаснуудыг “Minerva Goddis” брэнд бүтээдэг. Монгол загвар зохион бүтээгчдийн зогсолтгүй хөдөлмөр, шинийг санаачлах байдал, тууштай зангийн үр дүнд хэний ч харцыг булаам хувцас бий болдог. Энэхүү цаг өнгөрөх тусам үнэ цэнээ хадгалж яваа брэндийн үүсгэн байгуулагч хоёр бүсгүйг танилцуулж байна. Тэд хэдий хоёулаа ажилладаг ч бүтээгдэхүүн бүр дээрээ сэтгэлээ шингээн урлаж, хувцас бүрд тохирсон мэргэжлийн зураг авалтыг хийдэг билээ.

       Байгуулагдаад хоёрдох жилийнхээ нүүрийг үзэж буй тус брэнд нь энэ жил анх удаа загварын шоугаа амжилттай толилуулсан билээ. Ингэхдээ зөвхөн эрэгтэй моделиудыг загварын тайзнаа алхуулсан юм. Minerva Goddis эрэгтэй, эмэгтэй аль ч хүйсийн загварын мэдрэмжтэй хүн өмсөхөд зориулагдсан хувцас урлахаас гадна хувцас бүр нь цөөн тоогоор үйлдвэрлэгддэг.

МӨРӨӨДӨЛДӨӨ ИТГЭЛТЭЙ БАЙВАЛ ЯМАР Ч ЦАГ ҮЕД АМЖИЛТ ОЛНО

      “Minerva Goddis” брэндийн харц булаам загварыг гаргаж, бодит болгон урладаг бүсгүй бий.Тэр бол тус брэндийг үүсгэн байгуулагч, ерөнхий дизайнер Г. Анударь юм. Тэрбээр анх цар тахлын үеэр өөрийн брэндээ эхлүүлж байжээ.  “Мөрөөдөлдөө итгэлтэй л бол чи ямар ч цаг үед эхэлсэн амжилт олдог” гэх үгний бодит жишээ билээ.  Хоёр жилийн хугацаанд нийт 400-500 төрлийн хувцасны загварыг зохиож, урлажээ. Ингэхдээ загвар бүрээ үнэ цэнтэй байлгахын тулд цөөн тоогоор үйлдвэрлэсэн байна. Г.Анударь “Манай хувцсыг нэг л өмссөн бол тайлахыг хүсэхгүй” хэмээн өөртөө итгэлтэйгээр ярьдаг. Зөвхөн загварыг нь гаргаж, урлаад зогсохгүй хувцас бүрд нь тохирсон зураг авалтын санааг гаргаж, найруулагчаар нь мөн ажиллана. Г.Анударь нь хувцас загваруудынхаа өнгө зохицол, материалын шинж чанарыг олон жил судалж, туршсан бөгөөд судалгаан дээр үндэслэн загваруудаа чанартай хийхийг зорьдог аж.Тэр чанартай зүйлийг худалдан авагчдадаа санал болгохыг хүргэхийг хүсдэг. Түүний зорилго ч биеллээ болж өнөөдөр “Minerva Goddis” брэнд хэдийн байнгын үйлчлүүлэгчидтэй болжээ. Мөрөөдлөөрөө жигүүр хийж амжилттай “нисэж” байгаа тэрбээр дахиад хийх, бүтээх олон зүйл байна гэж ярих дуртай.

ДАРСАН ГЭРЭЛ ЗУРАГ НЬ ТҮҮНИЙ ӨМНӨӨС ЯРИНА

     Харц булаам хувцсыг  загварт нь тохирсон зураг авалттайгаар худалдан авагчдад хүргэх амаргүй даваа. Тэгвэл “Minerva Goddis” брэндийн чамин загварын хувцсыг гэрэл зургийн хальснаа чадварлаг буулгадаг нэгэн бол И.Хулан. Тэрбээр их сургуульд суралцдаг бөгөөд хичээлийнхээ хажуугаар брэндээ хөгжүүлэх ажилд хөдөлмөрлөдөг. Гэрэл зургийн хобби нь түүнийг энэхүү ажилд оруулсан ажээ. И.Хулан брэндийнхээ зураг авалт, дизайн хөгжүүлэлт дээр бүтээлчээр хандан ажилладаг нэгэн гэдгийг багийнхан нь хэлж  байлаа.  Дарсан гэрэл зураг нь түүний өмнөөс ярьдаг. Дарсан гэрэл зураг бүр нь тухайн загварын онцлогийг илт харуулна. Бүгд өгүүлэмжтэй, цэгцтэй.  Тэр чадварлаг гэрэл зурагчнаас гадна амьтанд хайртай тэдний төлөө хийсэн ажил бүрд оролцохыг хичээдэг сайн дурын ажилтан. “Minerva Goddis” брэнд  өдий зэрэгтэй амжилттай яваа нь И.Хулан бид хоёрын шаргуу хөдөлмөр гэж брэндийн захирал Г. Анударь дурдаж байсан юм. 

     Тэд ажлын хамтрагчаас гадна сайн найзууд, нэг гэр бүл. Зорьсон, мөрөөдсөн л бол тэд түүндээ хүртэл шургуу хөдөлмөрлөдөг гэдгийн тод жишээ нь “Minerva Goddis” брэнд юм.  “Бид хоёрт хүнд хэцүү цаг үе олон тулгарч байсан. Гэхдээ бид брэндийн үзэл санааныхаа үнэ цэнийг авч үлдэж чадсан” хэмээн хоёр бүсгүй бахархалтайгаар ярьж байсан юм.