Хүмүүст инээд, баяр хөөр бэлэглэдэг хошин урлагийн нэг тод өнгө, авьяаслаг жүжигчин Н.Цэнд-Аюуштай ярилцлаа. Уран бүтээлээсээ хэсэг завсарлага авсан тэрбээр “Гэнэтийн зочид” дэлгэцийн олон ангит уран бүтээлээр үзэгчидтэйгээ дахин уулзаж байна. Түүний хувьд Хүүхэд залуучуудын театрын сүүлчийн боловсон хүчин бөгөөд театртаа ажиллах чин хүсэлтэй байжээ. Харамсалтай нь нийгэм, цаг үеийн байдлаас шалтгаалан хүүхэд залуучуудын театр үйл ажиллагаа явуулах боломжгүй болсон учир жүжигчин А.Өнөржаргал, Н.Цолмонбаяр нартай хамтран “Тв коктейль” хамтлагаа байгуулж байжээ. “Өмнө нь хэн нэгний бүтээгээгүй шинэ дүр бүтээмээр байна” хэмээн ярих түүний ярилцлагыг хүргэж байна.

-Сайн байна уу. Таны хувьд уран бүтээлээсээ хэсэг хугацаанд завсарлага авсан шүү дээ. Үзэгчиддээ ямар уран бүтээлтэй эргэж ирсэн бэ?

   -Сайн байна уу. Тиймээ хэсэг хугацаанд уран бүтээлээсээ чөлөөлөгдсөн байж байгаад эргэн орсон. “Гэнэтийн зочид” дэлгэцийн олон ангит киноны гэрийн эзэгтэй, сэтгэл зүйч эмэгтэйн дүрээр үзэгчидтэйгээ уулзаж байна.

-Тухайн дүр тань Н.Цэнд-Аюуш гэдэг жүжигчнээс ямар чадвар шаардсан дүр байв?

   -Энэ киноны зохиол нь их сайхан. Яг л айл гэрт тохиолддог олон асуудлыг хэрхэн даван, туулж буй тухай гардаг л даа. Дүрийн хувьд жүжигчин хүн өөрөөсөө тэс хол, тийм өөр хүнийг бүтээнэ гэж байдаггүй л дээ. Тодорхой хэмжээнд өөртэй нь төстэй байж л илүү сайн бүтээдэг болов уу. Тиймээс энэ дүр минь миний өөрийн зан, төлөвөөс их хол зөрөөгүй шүү.

-Таныг хүүхэд, залуучуудын театрт суралцаж, төгссөн гэж дуулсан. Оюутан цагаа эргэн дурсвал?

   -Тийм ээ. Залуус одоо төдийлөн сайн мэдэхгүй болов уу. Хүүхэд залуучуудын театрын хамгийн сүүлийн боловсон хүчин болно гэж бэлтгэгдсэн манай ангийн 20 гаруй хүүхэд байдаг. Тухайн үедээ 200 гаруй хүүхдээс шалгарч орж байсан шүү. АЖ А.Очирбат, МУГЖ Ш.Алтанцэцэг, МУГЖ О.Бат-Өлзий гээд олон сайхан багш нараар хичээл заалгаж байлаа. Тэгээд тухайн үед театрт тавигдаж байсан “Элдэв зураг”, “Үнэтэй хүүхэд” зэрэг олон уран бүтээлд хамтарч оролцож байсан азтай хүүхдүүд.

-Оюутан байхдаа ногооны лангуунд худалдагч хийдэг байсан гэж дуулж байсан. Бас л оюутан цагийн сайхан дурсамжийн нэг болов уу?

-Тийм шүү дээ. Би Төв аймгийн Батсүмбэр сумын хүүхэд. “Сангийн аж ахуйн хүүхэд болохоороо оюутан болоод ногоо зарж байна” гэж хүмүүс магтаад ч байгаа юм шиг шоолоод ч байгаа юм шиг ярьдаг байлаа. Гэхдээ яадаг юм бэ. Үнэн юм чинь. Оюутан байхад манай ангийн хүүхдүүд бааранд ажиллаад хэрэглээний мөнгөө олоод байна. Тэгэхээр нь би ах, эгчдээ “Ажил хиймээр байна” гэж хэлсэн. Гэтэл “Тийм зүйл байхгүй. Мөнгө олмоор байгаа бол ногоо зар” гээд ногоо зарж байсан. Тэгээд би бүр баяжсан шүү дээ. Тэр жилдээ л "бурзгар" оюутан байлаа. /Инээв/

-Сургуулиа төгсөөд театртаа ажилласан уу?

   -Сургуулиа төгсөөд театртаа ажиллахыг маш их хүссэн. Харамсалтай нь цаг төрийн байдлаас болоод театр минь үйл ажиллагаа явуулах боломжгүй болсон доо. Тэгээд л бид хувиараа уран бүтээл туурвиж эхэлсэн.

-“Тв коктейль” хамтлаг дэлгэцийн хэд хэдэн бүтээлтэй шүү дээ. Хөнгөн, инээдмийн жанрын кинонд бас л нэг өнгө, дэвшил болж байсан шүү.

   -Тийм шүү, манай хамтлаг “Намрын синдром”, “Омарын эрэлд”, “Сайн уу амьдрал минь” зэрэг уран бүтээл үзэгчдийн хүртээл болгосон байгаа. Тэдгээрээс хамгийн хайртай кино минь бидний анхны уран бүтээл болох “Намрын синдром” кино байгаа. Тэр киног одоо үзэхэд өөр санагдаж магадгүй л дээ. Гэхдээ л тухайн үедээ залуусыг байлдан дагуулж, кино урлагт бас нэг өнгө нэмж байсан. Тухайн киноныхоо буянаар бүгд байрны урьдчилгаа, өөрсдийн студи, техниктэй болж байлаа. Тэгээд бодохоор их буянтай бүтээл байгаа биз.

-“Тв коктейль” хамтлаг бас тайзны жүжигтэй байх аа. Бүр тэр жүжгээрээ “Гэгээн муза” шагнал хүртэж байсан шүү дээ.

    -Тийм шүү. “Шинэ үе” продакшнд байхдаа Өөскө, Цоомоо хоёртойгоо танилцаж байсан. Тухайн үед тайзаа их санадаг байсан. Тэгээд хамтлагаараа “Хоёр ертөнцийн буудал” жүжгээ тавьж байсан. 2013 онд тэр гол дүрээрээ “Гэгээн муза” наадмын шилдэг эмэгтэй гол дүрийн шагнал авч байсан. Жүжигчин хүнд авах ёстой кайф гэж байдаг бол тэр үед л авч байлаа.

-Одоо тийм гоё дүрийн санал ирж байна уу. Ер нь ямар дүр бүтээхийг хүсэж байна вэ?

   -Уран бүтээлийн санал их ирж байна. Миний хувьд одоо жүжигчин мэргэжлийнхээ ур чадварыг харуулсан дүр бүтээмээр байна. Өмнө нь хэн нэгэн бүтээсэн биш шинэ дүр бүтээмээр байна.

-Өнөөдрийг хүртэл бүтээсэн дүрүүдээс тань хүний сэтгэлд үлдсэн, сайн гэсэн дүрээ нэрлэвэл?

   -Сайн санахгүй байна. Санаанд буухгүй байхыг бодоход тийм дөнгүүр дүр бүтээж амжаагүй юм болов уу. Яг үнэндээ тайзны уран бүтээлийг хүмүүс төдийлөн үздэггүй юм аа. Жүжгийг маань үзсэн зарим хүмүүс сайхан сэтгэгдлээ хуваалцдаг л даа. Түүнээс яг “Ягаан Гажид”, “Итгэлт баян” гэдэг шиг дүрийн хоч алга аа. Гэхдээ тийм дүр бүтээхийн төлөө хичээж байна.

-Жүжигчдийн хувьд гол болон туслах дүр дээр их ач холбогдол өгдөг юм шиг ээ. Таны хувьд туслах дүрийн саналыг хэрхэн хүлээж авдаг вэ?

   -Би юу гэж боддогоо үнэнээр хэлчих үү. Туслах дүр ч бай, гол  дүр ч бай найруулагч надад итгээд тухайн дүрийг өгч байгаад их баярлана. Тэгээд зохиолоо уншаад тухайн дүр кинондоо хэр үүрэг, оролцоотой юм, үнэхээр тэр дүр хэрэгтэй юу гэдгээс хамаарч нэг, хоёр сцена байсан ч хамаагүй тоглоно. Харин нээх шаардлагагүй, хэн ч бүтээчихмээр, тэр дүрийг аваад хаячихлаар үгүйлэгдэхээргүй тийм дүрийн саналыг бол хүлээж авдаггүй.

-Та хэвлэлд төдийлөн ярилцлага өгдөггүй. Магадгүй хувь хүн тань нээлттэй хүн биш байх?

   -Тийм ээ. Би ярилцлага, нэвтрүүлэгт тэр бүр ордоггүй. Өөрийн үнэ цэнэ гэж байдаг л даа. Мэдээж жаргал, зовлонгоо ярилцдаг хүрээллийн минь хүмүүс байна шүү дээ. Тэд нар минь байхад хангалттай. Мэдээж уран бүтээлээс шалтгаалаад ярих зүйл бий л дээ. Миний хувьд уулзалт бүр үнэ цэнэтэй байх ёстой.

-Ярилцсанд баярлалаа.

   -Баярлалаа.