ЦОГЦОС СҮЙТ БҮСГҮЙ

Б. СУВДАНЦЭЦЭГ:
Соёл урлаг- Кино ертөнц

2025-06-17, 309

Хэрэв таны хайрын ам тангараг үхэх хүртэл үнэнч байх ёстой бол тэр хайр үхсэний дараа ч үргэлжлэх үү? Тим Бертоны "Цогцос сүйт бүсгүй" хэмээх (2005) хүүхэлдэйн кино нь үхэл, хайр, үүрэг хариуцлага, хүний сонголтын талаар гүн гүнзгий, үлгэрийн хэлбэртэй боловч гүн ухааны өнгө аястай бүтээл юм. Үзэгчдийг хайр ба өрөвч сэтгэлийн хоорондын зааг дээр бодлогошруулж, ёс суртахууны хариуцлага болон хувь хүний эрх чөлөөний талаар эргэцүүлэн тунгаахад хүргэнэ.

Бүх зүйл нь хар цагаан, дүнсгэр Виктория хэмээх хотод шинэ баян загасны худалдаачдын хүү Виктор Ван Дорт, язгууртны охин Виктория Эверглот нар гэрээт гэрлэлтээ бэлдэнэ. Энэ гэрлэлт Ван Дортын гэр бүлийн нийгмийн давхаргыг өсгөж , Эверглотын гэр бүлийн баялгийг сэргээх ёстой байлаа. Хэдийгээр тэд эхэндээ сандарч байсан ч уулзсан даруйдаа хайранд өртөж, бие биедээ дурлаж орхив. Гэсэн хэдий ч сандаруу Виктор тангарагаа мартаж, бөгжөө унаган, хатагтай Эверглотын даашинзыг санамсаргүйгээр шатааснаар хуримын бэлтгэлээ нураана. Ойролцоох ой руу зугтаан очоод санамсаргүй байдлаар үхэгсдийн ертөнцөд ам тангараг өгч, Эмили хэмээх цогцос сүйт бүсгүйтэй гэрлэчихсэн байдаг. Эмили бол хайртай залуугийнхаа урвалтад өртөж нас барсан, сүнс нь амлалттайгаа зууралдан оршсоор байгаа бүсгүй. Тэрээр Викторыг жинхэнээсээ хайрлаж эхэлдэг боловч Виктор аль хэдийн өөр эмэгтэйд сэтгэл алдарсан учраас түүнээс зугтаахыг юу юунаас илүү хүснэ.

Үхлийн ертөнц амьдралаас илүү өнгөлөг, дуу хууртай, амьдралыг тайван орхисон сүнснүүдийн ертөнцөөр дүрслэгдсэн байдаг нь киноны уран сайхны ухаалаг шийдэл юм. Харин амьдын ертөнц хар, цагаан, дарамттай, хүйтэн дүрслэлтэй. Энэ нь амьдралын бодит дарамт, үүрэг, гэр бүлийн шахалт зэргийг шүүмжилсэн мэт. Гэвч киноны оргил хэсэгт Эмили өөрөө Викторыг чөлөөлж, түүний хайрыг хүлээхээс илүү эрх чөлөөг нь сонгон, үнэнч хайртаа хүлээлгүйгээр өөрөө тавьж явуулдаг. Энэ нь жинхэнэ хайр бол хүнийг өөртөө хүлээж үлдээх биш, харин түүний аз жаргалыг эрхэмлэн, өөрөө ч золиос гаргах бэлэн байдал юм гэдгийг илтгэнэ.

Цогцос сүйт бүсгүй хүүхэлдэйн кино нь гаднаа үлгэрийн хэлбэртэй ч дотроо хайр, итгэл, өршөөл, чөлөөлөлтийн тухай гүн ухааны асуултыг агуулдаг. Бид заримдаа хайр гэж ойлгож буй мэдрэмж маань үнэндээ өрөвдөх сэтгэл, эсвэл үүрэг байж болно. Харин жинхэнэ хайр бол хүний эрх чөлөөг хүндэтгэх, амьдралд нь орших эсэхээс үл хамааран түүний сайн сайхны төлөө өөрийгөө орхих ухаан юм.

Эмилигийн золиос бол жинхэнэ хайрын дээд илэрхийлэл. Тэр хайртай хүнийхээ аз жаргалын төлөө өөрийгөө чөлөөлсөн.

ЦОГЦОС СҮЙТ БҮСГҮЙ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.