"ХАЙР ХАРУУСАЛ"-ААС ЗУРА III ХҮРТЭЛХ Э.АЛДАР

Д. Бямбасүрэн:
Соёл урлаг- Кино ертөнц

2024-03-21, 1167

Багадаа огт урлагийн хүн болно гэж бодож байгаагүй юм билээ, тэр. Гэхдээ аав, ээж хоёр нь хоёулаа урлагийн хүмүүс болохоор ажил дээр нь дагаж очихоос эхлээд орчин ахуй нөлөөлсөн нь лавтай. Түүний аав Улсын филирмонийн хөгжимчнөөр ажиллаж байсан бол ээж нь Дуурь бүжгийн эрдмийн театрт нүүр хувиргагч, гэрэлтүүлэгчээр ажилладаг байсан байна. Э.Алдарыг төрөхөд аав нь Украин Улсын Киев хотод мэргэжлээ дээшлүүлэхээр явах болсноор гэр бүлээрээ явсан байна. Ингээд тэр аав, ээжтэйгээ Киев хотод 13 нас хүртлээ байж байгаад Монголдоо иржээ.

Харин жүжигчин болсон тухайгаа тэрбээр "Гэр бүлээрээ Киев хотод байсан болохоор дипломатч болно гэж дотроо их боддог байсан. Харин буцаж Монголдоо ирээд арван жилийн урлагийн үзлэгт орох гэж байхад “ТВ Коктейл”-ийн жүжигчин Э.Цолмонбаяр ах бид нарыг бэлтгэж өгч байлаа.

Яг урлагийн үзлэгийн өдөр миний гарах хэсэг дээр хөгжим гацаад, тэгээд хүмүүсийг уйдаахгүйн тулд жүжиглэх л хэрэгтэй байх гэж бодоод Цоомоо ахтай шууд тайзан дээр харьцаад, ямар ч алдаа байхгүйгээр урлагийн үзлэгээ авч гарч байсан юм.

Урлагийн үзлэг дууссаны дараа Цоомоо ах "Алдар аа, чи СУИС-ийн жүжиг ангид шалгалт өгөөч” гэж байсан, тэр үед "Дүү нь өөр хүсэл мөрөөдөлтэй" гээд л нэг их тоогоогүй. Учир нь МУИС-ийн Олон улсын харилцааны ангид сураад, шууд дипломатч болоод буцаад Орос руу явж амьдарна гэсэн бодлоосоо салаагүй байсан. Тэгээд аравдугаар ангид ордог жилээ өөрөө урлагийн үзлэгээ найруулан тавьж эхлэхэд манай ангийнхан ч гэсэн “Алдар аа, чи жүжигчин болооч” гэж хэлж байлаа. Төгсдөг жилээ МУИС, СУИС хоёрт хоёуланд нь шалгалт өгч, хоёуланд нь тэнцсэн. Яг сонгох үед "За ер нь жүжигчний мэргэжил гоё юм байна" гээд, өөрийгөө их сайн хөгжүүлэх юм бол болох юм шиг санагдаад сонгосон доо" гэсэн байдаг. Ингэж тэр урлагт, тэр дундаа тайз, дэлгэцийн урлагт авьяас билгээрээ асан дүрэлзэх эхлэлээ тавьжээ.

Асаж дүрэлзэж чадаж ч байгаа. Оюутан ахуй цагаасаа эхлэн хошин урлагийн "Өнгөт инээд", "Х-Түц", хамтлагийн тоглолтод оролцдог, ард нь бүжиглэдэг байж. Ингээд 2007 онд СУИС-ийг жүжигчин, найруулагч мэргэжлээр төгсөөд 2016 он хүртэл "Маск" продакшнд ажиллаж, олон сайхан номерийн дүрээр үзэгчидтэй уулзсан. Түүнийг бид ингэж анх хошин урлагийн тайзан дээрээс харж, сонирхолтой, содон, хөгжилтэй мөртлөө сургамжтай олон сайхан дүр нь сэтгэлд үлдсэн. Тэдгээрээс буриад найруулагч, нууцлагдмал охин, "Үхэртийн хөндий манайх" зэрэг номерын дүр нь санаанд тодхон. Мөн хамтлагийн ахлагч, МУГЖ П.Эрдэнзаантай царай төрхийн хувьд төстэй учир аав, хүү болж тоглодог нь тун тохирдог. Ингээд тэр хошин урлаг гэх том айлаас бусадтай баг болж ажиллахын давуу тал, өөрт оногдсон ажлаа баттай хийх суурийг сурч аваад, 2008 оноос эхлэн найзуудтайгаа "Фантастик" продакшныг байгуулж дэлгэцийн олон сайхан дүрээр уулзаж буй.

2006 онд тэр хамгийн анх О.Бат-Өлзий найруулагчийн "Хайрыг хайрла" киноны Тулгын дүрд тоглож байсан юм билээ. Дараа нь "Хайр Харуусал" киноны Өлзий , "Хүүгүй Ломбард" киноны Үрлээ, "Учрал"-ын Очироо , "Аз Жаргалын Шок" киноны Батаа, "Миний ах атаман" киноны Бамбарууш, "247 Градус" киноны Идэр, "Маш Нууц" киноны Самбуу, "Том Толгойтын Романс" киноны зохиолчоор ажилласан байна.

Мөн "18 Нас би чамд хайртай" кинонд зохиолч, найруулагчаар ажилласан бол "Зүрхний Хилэн" зохиолчоор нь ажиллаж, Дүгэрийн дүрийг бүтээсэн. Араас нь "One Night" киноны зохиолч, ерөнхий найруулагчаар ажилласан "37-р Точка" -ийн Шизогийн дүрд, "Zura" цувралын эхний ангийн зохиолч, найруулагчаар ажилласан завгүй он жилүүд хөвөрсөн. Харин тун саяхан нээлтээ хийгээд удаагүй байгаа "Zura" киноны гурав дахь цувралд тэр хөрөнгө, эрх мэдлийн төлөө төрд шургалж буй албан тушаалтануудыг арилгах, тэдний шударга бус хэргийн төлөө тэмцэж буй залуусын нэг болох Бэмбийгийн дүрд тоглосон.

Эрх мэдэлтнүүдээс болж эхнэр нь суумгай болсон тэр тэднийг нураан унагаж, буулгах зорилгодоо ч хүрдэг. Өөрт оногдсон дүрдээ ажиллахын хажуугаар хамт олныхоо төрүүлж буй бүтээлийн зохиолчоор ажиллаж, хэд гурван бүтээлд найруулагчаар ажиллаад амжсан чадварлаг уран бүтээлч тэр юм.

"ХАЙР ХАРУУСАЛ"-ААС ЗУРА III ХҮРТЭЛХ Э.АЛДАР

Шинэ мэдээ

Нийтлэлчид