Жүжигчин Э.Тодгэрэл энэ удаад “Фантастик” продакшны ЗУРА III, “Цэвэрлэгээ” уран сайхны киноны Авлигатай тэмцэх газрын ахлах комиссор Сэргэлэнгийн дүрд тоглолоо. Түүнийг бид “Бид гурвын болзоо”, “Намайг хайрла”, “Нүдээ аниад төсөөл”, “Яллагч”, “Хийморь”, “Сүнс”, “Цагаан эрэг”, “Ээж” зэрэг дэлгэцийн бүтээл болон тайзны содон дүрээр нь мэдэх билээ.

                 Тэгвэл энэ удаагийн дүр нь яах аргагүй онцлог байлаа.  Ажлаа үнэнч шударга хийх хүсэл хүн бүрд байдаг ч хөрөнгө мөнгө, эрх мэдэлтэй хүмүүсийн нөлөөгөөр өөрчлөгдөж, эсвэл тэдний үгээр байх, аялдан дагах, үгүй бол ажилгүй болж, бие, сэтгэлээрээ хохирох гэсэн сонголтод тулдаг. Үүний нэгэн төлөөлөл дүрийг тэр бүтээж чаджээ. Тэгэхдээ эцсээ хүртэл өөрийн үзэл бодолдоо үнэнч, мөн чанартай эзэн байж, харин бусдад өөрт нь үйлчилж байгаа мэт, хүслийг нь биелүүлж байгаа мэт болж эцэстээ тэднийг нураан унагааж чадсан. Заримдаа нээрээ өөрийн зарчмаа авч үлдэхийн тулд өрөөлийн талд байгаа мэт байж, энэ бохир, хүн чанаргүй нийгмээс хүнээрээ үлдэж чадах мэт. Энэ мэтээр түүний дүр олон зүйл бодогдуулж байв. Инээж байгаад л ар нуруу руу нь хутга зоодог хүмүүсийн дунд ч мөн инээж байгаад л нуруугаа хамгаалах ёстойг, тэдний буруу булхайг илчлэх ёстойг харууллаа. Түүний энэ дүр мандаж, унаж, буцаад хэн нэгний зориг дэмээр босож, дахин босохдоо бүр ч ухаалаг, болгоомжтой, сэргэлэн хөдөлж чадлаа. Түүнд баяр хүргэе.