Даруухан мөртлөө дөлгөөхөн их сайхан дүр юм, Н.Нархажид. Үүнийг бид "No Rules” киноны Ялгуун, "Хавтаст хэрэг" киноны ахлах дэслэгч Халиун, "Үнэн хайр" киноны дүрээр нь мэднэ. Тэрбээр Хөгжим бүжгийн коллежийг анхлан 2016 онд бүжгийн жүжигчин гэсэн мэргэжлээр төгсжээ. Тэгээд Үндэсний урлагийн их театрт нэг жил ажиллаад СУИС-ийн кино драмын ангийг сонирхон орж суралцсанаар урлагт хос морьтой уран бүтээлч болон яваа аж.

         Багаасаа бүжиглэх дуртай, Бүжиг л гэвэл нүд нь сэргэдэг хүүхэд байж. Тэгээд л бүжигчин болж, хамгийн дуртай зүйлээ хийхийн хажуугаар жүжигчин мэргэжлийг сонгож өөрт тохирсон дүрд чадварлаг тоглож яваа шинэ содон дүр. "No Rules” киноны балетчин эмэгтэй Ялгууны энгийн даруу зөөлөн дүрд үзэгчид татагдсан бол ахлах дэслэгч Халиунаагийн зориг, чадварлаг байдал ч мөн таалагдсан. Тэгэхээр тэр ямар ч дүрд гүн бат нэвтрэн орж үзэгчдэд хүргэж чадах уран бүтээлч гэдгээ харуулсаар байна.

          Н.Нархажид дэлгэцээс гадна тайзнаа ч мөн гарч яваа. Тайзны бүтээлээс анхлан "Ангарагаас ирсэн эмэгтэй" жүжгийн Цэнгэлийн дүрээр танилцсан бол одоо "Шөнө дундын бүжиг" жүжгийн Анкагийн дүрээр үзэгчидтэй уулзах нь. М.Батболд найруулагч түүнийг өөр нэг өнцгөөс буюу эсрэг дүрээр харуулахыг зорьжээ. Гал цогтой, сэргэлэн, өөрийн гэсэн үзэл бодолтой эмэгтэй Анкаг бид түүний бүтээсэн өнцгөөр харж, даруу төлөв тэр өөрийгөө хэр задалж, нээхийг харах нь. Тэрбээр "2007 онд Т.Отгонбат багшийн удирдсан ангид байхдаа дипломын жүжгээ тавих болоход "Шөнө дундын бүжиг" жүжгээр хамгаалж байхдаа л анх танилцаж байлаа. Энэ жүжгийн Анкагийн дүр бол залуу эмэгтэй жүжигчдийн хүсэн хүлээсэн дүр байх. Миний хувьд Анкагийн дүр хариуцлага шаардсан хүнд даалгавар. Гэхдээ хичээж ажилана" гэж. Тэгвэл тэр даалгавраа хэрхэн биелүүлснийг харах л үлдлээ.

        Бүжигчнээс жүжигчний ертөнц рүү орж тайз, дэлгэцэд ажиллахдаа тэр урлагийн хүний үнэ цэнийг улам бүр мэдэрч, найруулагчаас оногдсон дүрээ сайн гаргахын төлөө мэрийж бүтээлээс бүтээлийн хооронд яваа. "Шантрах үе гаралгүй яах вэ. Гэхдээ хамаг тархи толгой, сэтгэл зүрх бүхнээ зориулж байж уран бүтээл төрдөг гэж би боддог. Аль нэг нь дутах л юм бол худлаа болчихдог байх. Өөрийн тоглосон кино нээхэд л таашаал авдаг юм билээ. Нэг уран бүтээлд орж түүнийхээ үр шимийг хүртэхээр урам ордог юм байна. Үнэхээр л энэ мэргэжилдээ хайртай бол хөтлөгдөж явна гэж бодсон" гэж тэр ярьж.

         Ингэж л тэр өөртөө авдаг урмаас л дараагийн уран бүтээлд орох цэнэгийг авдаг байх нь. Харин хэзээ ч шантарч замын дундаас орхихгүй гэдгээ "Урлагийн замналаа хэзээ ч хаяхгүй. Бүжиглэнэ, жүжиглэнэ багаасаа л уран бүтээлч болно гэж боддог байсан учраас урлаггүй бол би галзуурах байх гэж боддог. Одоогоор төлөвлөсөн ажил байхгүй учраас ингэж бодож байж мэднэ. Гэхдээ сарын дараа би өөр зүйл төлөвлөөд явж байж магадгүй. Хүнд заримдаа юм хийж бүтээмээр эсвэл зүгээр л сууж баймаар үе байдаг шүү дээ. Би яг тийм бодолтой үе дээрээ байгаа." гэх хариултаараа баталсан юм. За Анкагаар уулзья, Н.Нархажид.