Ганцаардлын тухай хүүрнэх, хувь хүний дотоод мэдрэмж рүү шагайсан шилдэг кино бүтээлүүдийг нэрлэж баршгүй билээ. Ганцаардал болон гунигийн тухай хүүрнэх ч сэтгэлд тань ямарваа нэгийг мэдрүүлж, өнгө нэмэх арван киног санал болгож байна.

1. Түүнийх- Her (2013)

Америкийн найруулагч Спайк Жонзийн шинжлэх ухааны уран зөгнөлт “Түүнийх” бүтээлд жүжигчин Хоакин Феникс тоглосон билээ. Эхнэрээсээ салсан Теодор  Саманта хэмээх хиймэл оюун ухаант үйлдлийн системтэй харилцаж эхэлнэ. Түүнээс авах мэдрэмжүүд бодитой, үнэн тул бага багаар сэтгэл алдарна.  “Түүнийх” кино нь тухайн жилийн “Оскар”-ын дөрвөн шагнал хүртсэн  бүтээл билээ.

2. Мэри ба Макс- Mary and Max (2009)

Адам Эллиотын найруулсан бараан комеди тус бүтээл нь захидлын  найзууд болох Нью-Йоркт амьдардаг 44 настай залуу, Австралид амьдардаг найман настай охины амьдралаас сэдэвлэн бүтээсэн хүүхэлдэйн кино юм. 1970-аад оны үед үйл явдал өрнөх ба Мэри Динкл хэмээх найман настай охин сэтгэлээр унасан үедээ утасны жагсаалт авч, Макс Хоровитс нэрт, үл таних хүн рүү захиа илгээнэ. Хачирхалтай нь захианы хариу ирснээр тэдний нөхөрлөл эхэлдэг.

3. Байгаль руу- Into the wild (2007)

Америкийн жүжигчин, найруулагч Шон Пеннийн найруулсан “Байгаль руу” кинонд Эмиль Хирш дүр бүтээсэн билээ. Крис коллежоо төгсөөд гэр бүл, найз нөхөд, ер  бүхнээ орхиод байгальд амьдарч эрх чөлөө, аз жаргалыг хайхаар ганцаар явж, гайхамшигтай аялж чаддаг. Уг киног Жон Краукерийн ижил нэрт номоос сэдэвлэн бүтээжээ.

4. Хавар, зун, намар, өвөл, ахиад хавар- Spring, Summer, Autumn, Winter, and Spring (2003)

Солонгосын найруулагч Ким Ки Дукийн уг бүтээлийг кино шүүмжлэгчид сор бүтээл хэмээн үнэлэгддэг. Нэгэн буддын сүмд лам, шавь хоёр амьдарна. Сүмд ирсэн охинд ламхай дурлаж эхэлснээр үйл явдал өрнөнө.  Яриа, өрнөл багатай, дөрвөн улирлын өөрчлөлтөөр олон бэлгэдлийг хүүрнэж чаддаг  кино билээ.

5. Орчуулгын алдаа- Lost in translation (2003)

Найруулагч София Копполагийн хоёр дахь бүрэн хэмжээний бүтээл болох “Орчуулгын алдаа” кинонд Билл Мюррей, Скарлетт Иоханссон нар тоглосон билээ. Боб, Шарлотт хоёр Токиогийн нэгэн зочид буудалд хоёул ганцаардан буйгаа мэдэж, нэгэндээ хань болно.

6. Чанкин Экспресс-Chunking Express (1994)

Хонгконгийн найруулагч Вон Карвайн уг бүтээлд хайртай хүнээсээ салсан хоёр цагдаагийн түүх өрнөнө. 223 дугаартай цагдаа хайрт бүсгүйгээс салсныхаа дараа нэгэн бааранд танихгүй эмэгтэйтэй оройжин ярилцаж сууна. Угтаа тэд нэгэндээ хань болоход цагдаа, гэмт хэрэгтэн байх ч хамаагүй, чухамдаа хүний дотоод сэтгэл чухал болохыг харуулна. 663 дугаартай цагдаа хайртай хүнээсээ салсан ч шинэ хайр дурлалтай учирна. Хэдий хоёул  нүүр тулж уулзахгүй ч цаг хугацааны шугамаар уг дүрүүд хоорондоо холбогдох аж.

7. Гурван өнгө: Цэнхэр-Three colors: Blue (1993)

Польшийн найруулагч Кшиштоф Киесловскийн цагаан, улаан, цэнхэр хэмээх гурамсан бүтээл нь үзэгчид, шүүмжлэгчдээс өндөр үнэлгээ авсан билээ. Трилогийн “Цэнхэр” кинонд Францын алдарт жүжигчин Жюльет Бинош тоглосон. Гэр бүлээ авто ослоор алдсан бүсгүйн амьдрал, ганцаардал, шинээр амьдрах гэж хичээж буй түүхийг кинонд өгүүлнэ.

8. Хүслийн жигүүр- Wings of Desire (1987)

Германы найруулагч Вим Вендерсийн яруухан, уянгалаг “Хүслийн жигүүр” бүтээл бол түүний бүрэн хэмжээний хоёр дахь кино  юм. Уг кино үл үзэгдэгч хоёр сахиусан тэнгэрийн хүүрнэлээр эхэлнэ. Тэд хүмүүсийн үйлдэл, бодлыг ажиглана. Сахиусан тэнгэр Дамиел Марион хэмээх уран бүтээлч эмэгтэйд сэтгэл алдарснаар хүний ертөнцөд амьдрахыг хүссэнээр үйл явдал цааш өрнөнө.

9. Солярис- Solaris (1972)

Оросын суут найруулагч Андрей Тарковскийн шинжлэх ухааны уран зөгнөлт “Солярис” кино нь Каннын кино наадмын дээд шагнал хүртсэн бүтээл. Уг киног Польшийн зохиолч, философич  Станислав Лемийн ижил нэрт зохиолоос сэдэвлэн бүтээжээ. Далайгаар бүрхэгдсэн Солярис гариг дээр Оросын судалгааны баг ажиллах бөгөөд сэтгэл зүйч Крис Кельвин тэнд болж буй хачин жигтэй байдлыг судлах даалгавартай. Гэтэл хүнгүй газар өөр хүмүүс үзэгдэж, Крисийн өөд болсон эхнэр нь түүнд яг л бодит мэт харагдана.

10. Таксины жолооч-Taxi Driver (1976)

Уг бүтээл Америкийн найруулагч Мартин Скорсезегийн сод бүтээл билээ. Жүжигчин Роберт де Ниро ганцаардмал, ойлгомжгүй зантай таксины жолоочийн дүрийг бүтээсэн юм. Травис Нью-Йорк хотод ганцаар амьдардаг, нойр хулжих эмгэгтэй залуу. Оройн цагаар такси барихдаа хотын аймшигт, ялзарсан байдлыг нүдээр үзэх ч, сайн сайхан болгохын төлөө юу ч хийж байсангүй. Гэхдээ тэрбээр хайр сэтгэлтэй учирсныхаа дараа өсвөр насны бэлгийн мөлжлөгт өртсөн охиныг аврахыг зорьдог.

Эх сурвалж: www.tasteofcinema.com