12 дахь жилдээ зохион байгуулагдаж буй “Улаанбаатар” олон улсын кино наадмын хүрээнд “Монгол кино” хөтөлбөрт шилдэг бүтээлийг шалгаруулдаг уламжлалтай. Энэ жилийн “Хангарьд” шагнал гардуулах ёслол шилдэг кино зохиол, найруулга, продюсер, шилдэг бүтээл гэсэн дөрвөн төрөлд шилдгээ тодрууллаа.

Шилдэг кино зохиол “Гэргий” кино

Найруулагч Ж.Сэнгэдоржийн “Гэргий" киноны зохиолыг бичсэн М.Эрдэнэбат, Л.Нинжжамц, Ц.Гантуяа нар уг шагналыг хүртлээ.  Ж.Сэнгэдорж “Хангарьд” шагналыг “Би нар”,”Амьдрал” зэрэг бүтээлээрээ хүртэж байсан билээ.

Шилдэг найруулагч “Хөхөө” кино

“Хөхөө” бүтээлээрээ жүжигчин, найруулагч Ж.Жамьяансүрэн шилдэг найруулагч шагналыг гардлаа. “Мөрөөдлийн хөлөг онгоц”, “Бооцоо” зэрэг тайз, дэлгэцийн бүтээлд дүр бүтээж байсан ба “Секс эрх чөлөө” киног найруулж байсан юм. Ж.Сэнгэдорж дүүтэйгээ хамт “Хангарьд” шагналыг хүртлээ.

Шилдэг продюсер “Эмэгтэй” кино

“Эмэгтэй” киноны продюсер, жүжигчин Ч.Ундрал шилдэг продюсерын шагналыг хүртлээ.

Шилдэг уран сайхны кино “Хөхөө” кино

Найруулагч Ж.Жамьяамсүрэнгийн “Хөхөө” бүтээл шилдгээр шалгарлаа. Тэрбээр шагнал гардан авахдаа “Дүү бид хоёрыг өдий зэрэгтээ хүмүүжүүлж, урлагийн замд хөтлөн оруулсан аав, ээж хоёртоо баярлалаа. Энэ шагналыг дүү бид хоёрын хэн нь ч авсан ялгаагүй. Биднийг дээрээс харж, түшиж залж байдаг аавдаа барьсан хамгийн том бэлэг юм. Монголын кино урлагийн шилдгүүдийн нэг дүүтэйгээ энэ тайзан дээр өрсөлдсөндөө баяртай байна. Чи шүү. Киноныхондоо баярлалаа” хэмээн сэтгэгдлээ хэллээ.