2013 онд анхны ангиа толилуулж байсан “U film”-ын бүтээл “Single Ladies” киногоо долоон жилийн дараа “Single Ladies- төгсгөл ба эхлэл” нэртэйгээр төгсгөлөө.

Тус цуврал кинонд хорь, гуч, дөчин насны ганц бие эмэгтэйчүүдээр төлөөлүүлж, ганц бие ээж байх, хосын харилцааны ээдрээ, гэр бүлийн асуудлыг хөнгөхөн инээдмийн жанраар хөндөж, ханхүү хүлээдэг үлгэр бодит амьдралаас өөр, зөв хүнээ олж гэрлэх  хэрэгтэй гэдэг санааг хөгжилтэйгөөр тусгасан билээ. Өмнөх гурван ангид заяаны ханиа хайн залуучуудтай учрах ч эцэстээ гурван бүсгүй ганц бие хэвээр л үлдэж байв. Эхнэртэй гэдгээ нуух залуу, зуучлалаар гэрлэхийн сул тал хийгээд хүнээ таньж нөхөрлөх, мөн гэрлэлт бүр аз жаргалтай байдаггүй зэрэг олон санааг тусгаж байв. Харин саяхан нээлтээ хийсэн дөрөв дэх ангид XIII зууны эрин үед гурван эмэгтэйн түүх үргэлжилнэ. Түүхэн цаг үеэр киноныхоо сэдвийг сонгож, уран зөгнөлт болгон шинэчлэн найруулж, уран сайхнаар баяжуулсан шинэ өнгө төрх нь кино зураг, трейлерээс нь хүлээлт үүсгээд байгаа билээ.

Кино продюсер МУСТА Г.Ундармаа кино нээлтэд “Хаалтын ангиа бид ашиг сонирхлоос илүү уран бүтээлчдээ дэмжих үүднээс гаднын уран бүтээлчдээс туршлага судалж, багаар ажиллах ямар байдгийг бусад уран бүтээлчдэдээ үзүүлье хэмээн “Single Ladies-4”-ыг тэс өөрөөр хийсэн юм” хэмээн дурдав. Тус киноны найруулагч Л.Бат-Амгалан  “Уг кино бусад ангиасаа тэс өөр, шинэлэг болсон” хэмээн нэгэн ярилцлагадаа дурдаж байсан юм.

“Single Ladies-4” киноны баримтуудаас дурдвал:

• Орос, Буриад, Англи, Турк, Португали, Финланд, Африк, Казакстан, Герман, Монгол зэрэг олон улсын нийт 285 уран бүтээлчид кинонд оролцон тогложээ.
• Косем хатан киноны зураг авалт хийсэн цайзыг нэг өдөр түрээслэсэн.
• Хятад Улсаас хоёр Арри камерыг хариуцагч хүнтэй нь 54 хоног түрээслэсэн.
• 350 кг төмрөөр баатрын хувцас, хуяг дуулга хийсэн.
• 2200 метр даавуугаар жүжигчдийн хувцас, хэрэглэл хийсэн.
• 50 метр арьс, шир ашиглаж цэргийн хувцас эдлэл хийсэн.
• Гоёл чимэглэл хийхэд найман кг чимэглэл ашигласан.
• Баатрын бамбай хийхэд Нарантуул захад зарж байсан хөнгөн цагаан тогооны тагуудыг бүгдийг нь худалдаж авсан.
• Тэмээн тэрэг гурав, морин тэрэг гурвыг, эртний хийцээр 30 сая төгрөгөөр хийлгэсэн.
• Зураг авалтын үед тэмээн болон, морин тэргийг 28 удаа угсарч, ачиж буулгасан.
• 23200 метр нойтон салфетакаар жүжигчдийн нүүрийг арчсан.
• Дөрвөн кг бор кремээр нүүрээ будсан.
• Хиймэл цус 50 литрийг ашигласан.
• 26 машин 60 хоногийн турш тасралтгүй ажиллахдаа 26455 литр шатахуун хэрэглэсэн.
• Нэг бөхтэй гурван тэмээг нэг өдөр түрээслэсэн.
• Долоон тэмээ, 141 морийг 30-54 хоног түрээслэсэн.
• Эмнэг хангал 40 морийг байлдааны зориулалтаар сургасан.
• Кино багийнхан 54 хоногт 50 хонь, 11 үхэр идсэн.
• Ширүүн аадар борооноор гурван удаа үерт автаж, байршлаа сольж нүүсэн.
• +40 градусаас -40 хэмд зураг авалтаа хийсэн.
• Хөдөө зураг авалтын үед нэг хүний гэр нь шатсан. /түүнд тавилгатай гэр бэлэглэсэн/
• Нийт зардлын 2.8 хувийг ивээн тэтгүүлсэн.
• Киноны 40 хувь нь дайн байлдаантай зэрэг сонирхолтой баримтуудыг дурдаж байлаа.

“Single Ladies” цувралын турш

• 1144 уран бүтээлчтэй хамтарч ажилласан.
• 1 тэрбум 608 сая төгрөгийн цалин уран бүтээлчдэд олгосон.
• Нийгмийн хариуцлагын хүрээнд “U film”-ийн хамт олон киноны орлогоосоо зургаан эмнэлэгт засвар тохижилтод нь зориулж 116 сая төгрөгийг хандивлаж байжээ.