“Хүүхэд насанд хүргэж өгдөг” галт тэрэгний тухай дууг мэдэхгүй хүн үгүй болов уу. Тухайн дууны үгэнд нэг их хүн үнэмшээд байдаггүй ч хүүхэд багачууд үнэн сэтгэлээсээ итгэж, дуулах дуртай нь өхөөрдмөөр санагдана. Үнэхээр хүүхэд насанд хүргэх галт тэрэг байдаг бол бид бүгдийн баяр хөөр хэмжээлшгүй дүүрэн байх биз. Ээлжит тэмдэглэж буй анимэ нь үүний тухай өгүүлнэ.

Зохиолын гол дүр болох Арата Кайзаки нь 27 настай, нийгмийн идэвхгүй нэгэн. Тэрээр оффисын ажилчин бөгөөд зөвхөн дарга нарынхаа л үүрэг даалгаварыг биелүүлнэ. Нэгэн орой ажлаа тараад харьж явахдаа ахлах сургуулийн дүрэмт хувцас өмссөн хүүтэй уулзсан нь түүний амьдралыг орвонгоор нь эргүүлнэ. Ёоакэ гэх хүү түүнд “Арван насаар залуужуулдаг эм” өгдөг. Магад хүн бүр Арата шиг адал явдлыг амьдралынхаа туршид хүлээдэг ч юм билүү. Бидний адал явдал тэр чигтээ цаг хугацаа ч юм шиг санагдана. Харьсныхаа дараа Арата түүнд төдийлөн итгээгүй ч туршихаар шийдэж, орондоо орохоосоо өмнө өгсөн эмийг нь уудаг. Бид залуу насандаа хичнээн хайртай вэ. Хурдан хөгшрөхийг хүсдэг хүн үгүй.

Харин залуу насандаа очихыг хүсдэг хүмүүс хэр их байдаг бол. Арата Кайзаки 17 насандаа эргэн очсон, гайхширам, зүүд мэт өглөөг угтах нь үзэгчид ч атаархам хувь тавилан болов. Улмаар түүний шинэ амьдралын  ахлах сургуулийн хөгжилтэй амьдрал элдэв, шог хошин явдлаар дүүрэн хачирхалтай үргэлжлэх нь нэн сонирхолтой.

Санамсаргүй цүнхэндээ янжуур авч явахаас эхлээд нийгмийн идэвхгүйгээсээ болж, найз нөхөдтэй болж чадахгүй зэрэг олон бэрхшээл түүнд тулгарна. Энэ нь магадгүй түүний гээсэн цаг хугацаа, баяр хөөр, аз жаргалаа буцааж олох боломж байж мэдэх юм.

Залуужуулах эмийг туршихыг түүнд санал болгосон Ёоакэ ч мөн ахлах сургуулийн ангид нь байв. Арата эхэндээ ойлгомжгүй байдалд хүрэх ч цаашлаад нэгнийгээ үзэн ядах, улмаар нэгэндээ бага багаар дотносч, Аратад сурагч байх үедээ мэдэрч чадаагүй сэтгэл хөдлөлүүдийг нь буцаан бэлэглэх аж. Хүн орходой, арьс өнгөлөгч, үрчлээ арилгагч гэх зэргээр бид залуу насандаа хичнээн хайртайг ч мэдэрч болох юм.

Тэдний хэн нь ч залуу настайгаа үүрд үлдэхгүй гэдэг л үүрд гунигтай хэвээр үлдэнэ. 27 настай нийгмийн идэвхгүй Арата Кайзакигийн 17 насандаа эргэж очин, алдсан, хажуугаар нь зөрж өнгөрсөн бүхий л сайхан зүйлсийг эргүүлэн олж авах түүний адал явдал одоо ч үргэлжилсээр л...