Нүүрсний хулгайн хэрэгт холбогдсон УИХ-ын гишүүн Ц.Сэргэлэн Чуулганы нэгдсэн хуралдааны үеэр Дорнод аймгийн Баянтүмэн сумын Хашаатын цав уурхайд хөрс хуулалтын үйл ажиллагаа явуулж байгаа “Меланж” ХХК нүүрсний хулгайн хэрэгт хамааралтай мэтээр ярьжээ. Тиймээс “Меланж” ХХК УИХ-ын гишүүн Ц.Сэргэлэнгийн ташаа мэдээлэлд мэдэгдэл гаргажээ.

      “Меланж” ХХК дараах мэдэгдэлдээ “Нүүрсний хулгайн асуудалд Дорнод аймгийн Баянтүмэн сумын нутагт орших Хашаатын цав уурхайд хөрс хуулалтын үйл ажиллагаа явуулж байгаа “Меланж” ХХК-г хамааралтай мэтээр УИХ-ын гишүүн Ц.Сэргэлэн мэдэгдэж, манай компанийн нэр хүндэд үндэслэлгүй халдсанд харамсаж байна. Манай компани нь 2022 онд хөрс хуулалтын ажлаа эхлүүлсэн ч бүрэн дуусаагүй, нүүрс олборлолт ч эхлээгүй учир нэг ч киллограмм нүүрс экспортлоогүй. Гэтэл нүүрсний хулгайн завхралд “Меланж” ХХК-г холбогдуулан шалгах ёстой мэтээр олон түмэнд үндэслэлгүй гүтгэлэг тараасан нь хариуцлагагүй үйлдэл болжээ. УИХ-ын гишүүн Ц.Сэргэлэн та тус компанийн талаарх мэдээллээ нягтлан шалгаж, залруулга хийнэ үү” гэжээ.