Нүүрсний хулгайн хэрэгт холбогдсон зарим гишүүд АТГ-ын гадна мэдээлэл хийж байна.

    Энэ үеэр УИХ-ын гишүүн Б.Баттөмөр "Монголын авлигал ил тод болсон. Миний ярьдаг зүйл бол далд эдийн засаг. Монгол Улсын Ерөнхий сайд  ч өөрөө "Монгол Улсын  эдийн засагтай тэнцэх хэмжээний далд эдийн засаг урд хил дээр байна" гэж хэлсэн шүү дээ. Тэгвэл энэ далд эдийн засаг дотор чинь нүүрсний хулгай байна. Гэтэл надад сануулга өгч байгаа юм уу, яаж байгаа юм миний нэрийг оруулсан байна. Би "Тавантолгой" гэх газрыг мэдэхгүй. Хэрэв очвол хүнээр заалгаж очно. Х.Ганхуяг гэх нөхрийг зүс танина. Нэг ч удаа уулзаж байгаагүй. Надад хийсэн гэрээ байхгүй. Би машин явуулдаггүй. Миний "ТЭС ПЕТРОЛИУМ" гэх компани байна. Харин Өмнөговь аймгийн Цогтцэций суманд шатахуун түгээх станц бий. Шатахуун түгээх станцаас тус суманд явдаг машин, хөрс суулт төмөр зам тавьдаг компаниуд гэрээ хийгээд, мөнгөө шилжүүлээд авдаг. Өөр надад юу ч байхгүй. Хэрэв би хулгай хийсэн бол шууд хариуцлагаа хүлээнэ" гэв.