Засгийн газрын ээлжит бус хуралдаанаас гаргасан шийдвэрийг танилцуулах үеэр Хууль зүй, дотоод хэргийн сайд Х.Нямбаатар сэтгүүлчийн асуултад хариулсан.

     Тэрбээр "Цогтцэцийд ажлын хэсэг ажиллаж байгаа. Мөрдлөгийн явцад зарим тээврийн хэрэгсэл маш олон удаа хоосон гарсан гаалийн болон хилийн мэдээлэл байна. Бид хоёр хэрэг нэгтгэж гаргах гэж байна. Энд зөвхөн жижиг Тавантолгойн асуудал. Мөн том Тавантолгойд Уул уурхай хүнд үйлдвэрийн сайд Ж.Ганбаатараар ахлуулсан ажлын хэсэг ажиллаж байна. Нүүрсний олборлолтыг сансрын тойм зургаар авсан зураг байна. Сансарын аргаар авсан зургийг ашиглан 12 жилийн хугацаанд нүүрс олборлосон хийгээд бусад мэдээллийг илрүүлэхээр ажиллаж байна.

     Өнөөдөр Засгийн газрын хуралдаан дээр Ерөнхий сайд чиглэл болгосон. Ингэхдээ Үндэсний аюулгүй байдлын тухай хуульд өөрчлөлт оруулах даалгавар өгсөн. Үндэсний аюулгүй байдлын зөвлөлөөр  аж ахуйн зориулалттай гэрээ байгуулахыг хориглох зохицуулалтыг оруулахаар болсон. Цаашид аж ахуйн гэрээ хэлэлцээр гаргахгүй байхаар хуульчлах юм. Мөн Төрийн болон Албаны нууцын тухай хуульд давхар өөрчлөлт орж, энэ төрлийн бичиг баримтыг авахгүй байх өөрчлөлт оруулж байгаа. МАН-ын бүлгийн хуралдаанаар яаралтай горимоор Эргүүгийн хэрэг хянан шийдвэрлэх хуулийн төсөлд өөрчлөлт оруулах талаар ярьж байна. Мөн Эрүүгийн хуулийн 22 дугаар зүйлд заасан тодорхой төрлийн гэмт хэргүүдийг хэрэг хялбаршуулсан журмаар хянан шийдвэрлэхгүй байх, хэрэгт шалгагдаж байгаа хүмүүстэй ял тохиролцож, торгуулахгүй байх, ердийн журмаар хэрэг шийдвэрлэх асуудлыг оруулж байгаа. Мөн Төрийн болон Орон нутгийн өмчит компанийн тухай хуулийг хэлэлцүүлэх ёстой" гэв.