УИХ-ын чуулган хуралдаж байна. Хуралдааны үеэр УИХ-ын дарга Г.Занданшатар нүүрсний асуудалтай холбоотой саналаа хэллээ.

     Тэрбээр “Улс орны нийгэм, эдийн засаг, цаг үеийн нөхцөл байдал амаргүй. Үнийн өсөлт, инфляц, орлогын хомсдол иргэдийн амьжиргааг доройтуулсан. Мөн шударга ёс алдагдсан, гэмт хэрэг, баялгийн хулгайтай тууштай тэмцэх асуудал ард иргэдийн бухимдлыг төрүүлж, төв талбай дээр тав дахь өдрөө жагсаал хийж,  шаардлага тавьж  байна. Үүнийг үл тоомсорлох ёсгүй. Тэд шударга ёсыг нэхэж, ард түмний баялгийг хулгайлсан гэмт үйлдлийг түргэн шуурхай шийдвэрлэхийг шаардаж байгаа нь зүй ёсны шаардлага гэж үзэж, УИХ-аас ажлын хэсэг байгуулсан.  Уг ажлын хэсэг өчигдөр хуралдаж, нүүрсний хулгайн асуудлаар нийтийн сонсгол зохион байгуулах саналыг Эдийн засгийн байнгын хороонд оруулсан. Хуулийн дагуу 14 хоногийн дотор бэлтгэл хангаж, нийтийн сонсголыг зарлана. Энэ сарын 21-ны 11:00 цагаас нээлттэй сонсгол хийхээр шийдвэрлэлээ” гэлээ.