МАН-ын бүлгийн хуралдаанаас гаргасан шийдвэрийн талаар мэдээлэл хийж байна.

       МАН-ын бүлгийн дарга Д.Тогтохсүрэн "Өнөөдөр жагсагчид нүүрсний хулгай болон бусад ажлын хариуцлага алдсан хүмүүст хариуцлага тооцох ёстой гэсэн шаардлага тавьж байгаа. Үүнийг Засгийн газар нэн тэргүүнд шийдэх хэрэгтэй. Улмаар Эрүүгийн хэрэг хянан, шийдвэрлэх тухай хуулийг шинэчлэх хэрэгтэй. Энд авлига, албан тушаалын гэмт хэрэгт холбогдсон  хэргийг хурдан шийдэх заалт тусгана. Тиймээс ойрын хугацаанд Засгийн газар хуулийн төслийг хэлэлцүүлж, яаралтай УИХ-аар хэлэлцүүлэх хэрэгтэй. Мөн нүүрсний хэрэгтэй холбоотой нийтийн сонсгол явуулна. Хуралдааны товыг Эдийн засгийн байнгын хороо маргааш хэлэлцэж батална. Хуулийн дагуу 14 хоногт шийдэх ёстой. 

      Засгийн газар яаралтай хуралдаж оптек гэрээ буюу урьдчилсан гэрээнүүдийг нууцаас гаргах шаардлагатай. УИХ цаашид уул уурхайн бүтээгдэхүүн дээр хулгай гаргахгүйн тулд УИХ дээр Уул уурхайн биржийн тухай хуулийг оруулж, яаралтай батлах хэрэгтэй. Уул уурхайн биржийн тухай хуулийг хэлэлцүүлж эхэлсэн байгаа. Нээлттэй сонсголын үеэр төмөр замтай холбоотой асуудлыг хэлэлцэнэ. Хоёрдугаарт, энэ парламент Үндсэн хуулийн нэмэлт, өөрчлөлтийг авч үзэх хэрэгтэй гэж үзсэн. Иймээс УИХ-ын 54 дүгээр тогтоолын хүрээнд УИХ-ын тоо болон сонгуулийн тогтолцоотой холбоотой асуудлыг Засгийн газар судалж, энэ ондоо багтаан хэлэлцүүлэх хэрэгтэй гэж үзлээ. 

Ерөнхийлөгчөөс УИХ-ыг тараах талаар албан бичиг ирээгүй. Үндсэн хуульд УИХ тарах шийдвэр Их хуралд өөрт нь байдаг. Их хурлыг тараах саналтай хоёр субьект бий. Нэг нь Ерөнхийлөгч, нөгөө нь Их хурал өөрөө санал гаргана" гэв.