Монгол Улсын Ерөнхий сайд Л.Оюун-Эрдэнэ сүүлийн үед үүсэж буй нөхцөл байдалтай холбоотойгоор мэдээлэл өглөө.

 Тэрбээр “Жагсаалын үеэр иргэд нүүрсний хулгайчдыг зарлахыг шаардсан. Үзэл бодлоо илэрхийлсэн залуучуудад талархаж байна. Нүүрсний хулгайн асуудал олон нийтийн дунд ил тод болж байгаад Ерөнхий сайдын хувьд маш их итгэл төрсөн. Өчигдрийн жагсаалыг нүүрсний хулгайчид улс төржүүлэх гэж оролдсон. Би өмнөх Засгийн газарт ЗГХЭГ-ын дарга байхдаа  тэмцэж байсан. Яг энэ танхимд би "Оюу толгой" компанийг шүүхэд өгөх болсноо мэдэгдэж байлаа. Тухайн үед би дэлхийн хамгийн том уул уурхайн компани болох “Рио Тинто”-той хийх хуулийн  маргаан үр дүнд хүрэх болов уу гэж эмээж байсан. Тухайн үеийн тэмцлийг олон нийт дэмжсэн учир өнөөдөр бид амжилтад хүрч, татварын маргаанаа өөрсдийн талд шийдүүлсэн. Мөн "Эрдэнэт"-ийн 49 хувьтай маргаан юм. Шүүх энэ асуудлыг шийдэх л үлдсэн. Шүүхийн шийдвэрийг бид нүд цавчлахгүй харж байна. Дарханы төмөрлөгийн үйлдвэрийг эргүүлэн авсан ч амар байгаагүй. Олон нийтийн дэмжлэгээр гацсан олон асуудлыг бид шийдсэнээр Хөгжлийн банк хоёр бондын төлбөрөө хийх боломжтой болсон. Тухайлбал, “Чингис” бондын 1.5 тэрбум ам.долларын өрийг бүрэн төлж барагдууллаа. Мөн “Самурай” бондын өрийг төлөх мөнгийг Монгол банканд шилжүүлсэн” гэв.