Монгол Улсын сайд, ЗГХЭГ-ын дарга Д.Амарбаясгалан, Ч.Хүрэлбаатар сайд нар үүсээд байгаа нөхцөл байдалтай холбоотой асуудлаар мэдээлэл хийлээ. ЗГХЭГ-ын дарга Д.Амарбаясгалан “Засгийн газраас сүүлийн жилүүдэд үүссэн томоохон хулгайн гэмт хэргийг илрүүлэж байгаа. Ард иргэдийн бухимдалтай санал нэг байна. Засгийн газрын шийдвэрээр өнгөрсөн сард Эрдэнэс таван толгойд бүрэн эрхт төлөөлөгч томилж, нүүрс тойрсон гэмт хэргийг илрүүлэн шалгаж байгаа. Нийтдээ 385 мянган тонн нүүрсний гэмт хэрэг илэрснийг шалгаж байгаа. Өнөөдрийн байдлаар 15 орчим албан тушаалтан авилгалтай тэмцэх газар шалгагдаж байна. Үүнээс Улсын Их хурлын гишүүн Д.Бат-Эрдэнэ, Өмнөговь аймгийн Засаг дарга Р.Сэддорж нар шалгагдаж байгаа. Засгийн газрын гомдлоор тодорхой албан тушаалтнууд шалгагдаж байгаа. Олон нийтийн жагсаал цуглааныг өөр чиглэлээр ашиглах нөхцөл үүсдэг. Тиймээс аливаа зүйл хэлэлцээрийн замаар шийдвэрлэхийг уриалж байна. Засгийн газраас үүнээс ажлын хэсэг гаргаж, миний бие ахалж жагсаал цуглаан зохион байгуулсан иргэдтэй уулзаж, санал гомдолыг хэлэлцэнэ. Мөн Монгол Улсын ерөнхий прокуророос Ерөнхий сайдад хүсэлт ирсэн. Энэ нь хоёр улсын прокурор нүүрсний хулгай дээр хамтарч ажиллах хэрэгтэй байна гэдгийг илэрхийлсэн. Үүнтэй холбоотойгоор хэрэгт холбогдсон этгээдүүдийг хууль хяналтын байгууллага шалгаж байгаа. 385 мянган тонн нүүрс хулгайд алдагдсан нь тогтоогдсон. Засгийн газар үүнд хариуцлагатайгаар ажиллаж байна” гэв.