УИХ-ын чуулганы   хуралдаан эхэллээ. Газрын тосны бүтээгдэхүүний нэмэлт оруулах тухай хуулийн төслийн анхны хэлэлцүүлгийг хийж  байна. Гишүүд хэлэлцэж буй хуулийн төсөлтэй холбогдуулан асуулт асууж үг хэлж байна.

       Энэ үеэр УИХ-ын гишүүн Д.Өнөрболор "Бид цаг үеийн шаардлагад нийцсэн, төгс төгөлдөр чанартай хууль батлах үндсэн чиг үүрэгтэй. Нэн ялангуяа эдийн засаг агшсан, хүнд үед бидний үүрэг хариуцлага маш өндөр байх ёстой. Гэтэл тоо гүйцээх гэж байгаа юм шиг дутуу дулимаг, хууль баталж байгаан нь олны хүлээлтэд нийцэхгүй. Тухайлбал, Төр хувийн хэвшлийн түншлэлийн хуулиар дамжуулан эдийн засагт эерэг нөлөө бий болгох, төсвийн ачааллыг бууруулах зэргийг олонхоор хүч түрж үгүй хийлээ. Улс орны нийгэм эдийн засагт онцгой ач холбогдол бүхий хуулийг хариуцлагатай хэлэлцэн батлахын оронд эрэмбэ хүлээж болох аар саар асуудалд цаг заваа үрж сууна.

   Тухайлбал, хүний ой тойнд багтахгүй нүүрсний хулгай, Хөгжлийн банкыг тонож дээрэмдсэн, ЖДҮ-г залгисан, нийгмийн даатгалын сангийн асуудалд УИХ дүр эсгэсэн, иргэдийн амьдрал, хувийн хэвшилд нэмэр тусгүй, зарим талаараа сөрөг нөлөөтэй зүйлс хэлэлцэж суухын оронд ард иргэдийн бухимдлыг дээд зэргээр төрүүлээд буй улс орноо дээрэмдэж тоносон асуудлыг хэлэлцэж шийдвэрлэх нийгмийн захиалга үүсээд байна. Үүнийг анхаарах хэрэгтэй. Тиймээс дээр дурдсан асуудлаар холбогдох албан тушаалтныг дуудан гишүүдэд ил тод мэдээлэл өгөх хэрэгтэй байна. Нээлттэй сонсгол зохион байгуулахыг шаардаж байна" гэв.