Монгол Улсын Ерөнхийлөгч У.Хүрэлсүх Япон Улсад албан ёсны айлчлал хийсэн. Айлчлалын үр дүнгийн талаар Монгол Улсын Ерөнхийлөгчийн Тамгын газрын дарга Я.Содбаатар  мэдээлэл өглөө.

           Тэрбээр “Монгол Улсын Ерөнхийлөгчийн Япон Улсад хийж буй айлчлал үр дүнтэй болж байна. Япон, Монгол Улс харилцаагаа нэг төвшинд ахиулж, Энх тайвны төлөөх хөгжил цэцэглэлтийн тусгай стратегийн түншлэлийн харилцаанд шилжлээ. Ингэснээр хоёр улс ирэх 10 жилийнхээ замын зургийг тодорхойллоо. Мөн энэ айлчлалаар хоёр орны худалдаа, эдийн засгийн 10 жилийн дунд хугацааны хөтөлбөрийг тохирсон. Үүгээрээ  Япон, Монгол Улсын худалдааны эргэлтийг нэмэгдүүлэх, иргэд хоорондын төр, хувийн хэвшлийн түншлэл хоорондын хамтын ажиллагааг хөгжүүлэх чиглэлд тодорхой шийдвэрүүд гаргалаа.

       Ялангуяа манай хувийн аж ахуйн нэгжүүд Японы аж ахуйн нэгжүүдтэй гэрээ байгууллаа. Үүний хүрээнд манайх тус улстай хамтарч, хиймэл дагуул хөөргөх, махны экспорт, хөнгөн хүнсний үйлдвэрлэлийн экспорттой холбоотой асуудлыг ярилцсан.

     Хамгийн гол асуудал нь нүүрс, химийн үйлдвэр монголд хөгжүүлэх чиглэлээр томоохон судалгааны ажил эхлүүлэхээр ярилцсан. Энэ нь манай улсын эдийн засагт, уул уурхайн салбарт том ахиц авч ирнэ. Нүүрснээс гаргаж болох ус төрөгч, газ, түлш гаргаж авах боломжтой болно.

         Мөн Монгол, Японы хооронд хүн төвтэй харилцааг тодорхойлсон. Монгол Улсын хүний нөөц бэлтгэх асуудалд анхаарч ажиллахаа мэдэгдлээ. Одоо хэрэгжиж байгаа 1000 инженер төслөө үргэлжлүүлж, байгаль орчны чиглэлээр 20 мянган залуусыг бэлтгэхээр болсон. Хоёр орон эрчим хүчний салбарт хамтарч ажиллахаар тохиролцсон. Энэ удаа Ерөнхийлөгч тус улсын Цог жавхлант Эзэн хаанд бараалхаж, Морин хуурын чуулгын тоглолтыг үзэж сонирхсон. Энэ нь Ерөнхийлөгчийн айлчлалд ач холбогдол өгч байгаагийн илэрхийлэл юм” гэв.