Монгол Улсын Ерөнхийлөгч У.Хүрэлсүх, гэргий Л.Болорцэцэгийн хамт БНХАУ болон Япон Улсад төрийн дээд хэмжээний айлчлал хийж байгаа. Тус айлчлалын үеэр улс, орны хамтын ажиллагаанд харилцан тохиролцсон шийдвэрүүдийг  Монгол Улсын Ерөнхийлөгчийн гадаад бодлогын зөвлөх Э.Одбаяр танилцуулав. 

    Тэрбээр “Энэхүү төрийн дээд хэмжээний айлчлалын хүрээнд Монгол Улс, Япон Улсын хооронд Стратегийн түншлэлийн харилцааг нэг шат ахиулж, Энх тайван, хөгжил цэцэглэлтийн төлөө тусгай стратегийн төвшинг тодорхойллоо. Түүнчлэн Монгол Улс гуравдагч хөршийн бодлогын хүрээнд Япон Улстай илүү ойр хамтран ажиллах, эдийн засгийн цар хүрээгээ тэлж, ирэх арван жилд ажиллах хамтын ажиллагааны хөтөлбөрийг баталсан юм. Ирэх арван жилд Монгол Улс, Япон Улстай хүнсний аюулгүй байдал, аж үйлдвэр, техникийг хөгжүүлэх, эдийн засгийн түншлэлийн харилцааг илүү үр өгөөжтэй хэрэгжүүлж ажиллах санамж бичигт хоёр орны удирдлагууд гарын үсэг зурлаа. Мөн Бүгд Найрамдах Хятад Ард Улсад хийсэн айлчлал нь олон талын боломжийг манай талд эергээр шийдвэрлэх чухал уулзалт болсон. Тухайлбал, худалдаа, хамтын ажиллагааг идэвхжүүлэх, ирээдүйд нээж болох бүхий л зам харилцааг өргөжүүлэх, цар тахлаас үүдэж хойшлогдсон ажлуудыг үргэлжлүүлэн гүйцэтгэхээр тохиролцсон. Харин томоохон бүтээн байгуулалтын хувьд Монгол Улсын Ерөнхийлөгчийн санаачилгаар Хүүхэд залуусын спорт цогцолбор, Үндэсний урлагийн их театрын бүтээн байгуулалтыг Хятад Улстай хамтран хэрэгжүүлэхээр тохиролцлоо. Монгол Улсын Ерөнхийлөгчийн Хятад, Япон Улсад хийж буй айлчлал хөрш орнуудтай харилцах цар хүрээгээ тэлсэн, үр дүнтэй айлчлал байлаа" гэв.