Монгол Улсын Морин хуурын чуулгынхан Япон Улсад 34 дэх удаагаа тоглолтоо хийлээ. Тэд энэ жил Япон Улсын хамгийн том театрт бүрэн бүрэлдэхүүнээрээ тоглосныг Япон Улсын Цог Жавхлант Эзэн хаан Монгол Улсын Ерөнхийлөгч У.Хүрэлсүхийн  хамт үзсэнээрээ онцлог болсон юм. Тус тоглолтыг Монгол Улсын Төрийн хошой шагналт, Ардын жүжигчин Н.Жанцанноров найруулсан байна. Энэ талаар Соёлын сайд Ч.Номингоос тодрууллаа. Тэрбээр “Бид тус тоглолтыг зохион байгуулахын тулд таван жилийн өмнөөс бэлдсэн. Морин хуурын чуулгынхан Япон Улсад 34 дэх удаагийн тоглолтоо хийж байгаа нь хоёр улсын харилцааг өргөжүүлэн таниулахад  чухал ач холбогдолтой. Монголын Морин хуурын чуулгынхан үргэлжлүүлэн 12 хотоор тоглолтоо хийнэ. Соёлын яам өнгөрсөн жил улсын хэмжээнд 100 гаруй арга хэмжээ зохион байгуулсан. Тухайлбал, өнгөрсөн долоо хоногт Улаанбаатар хотод соёлын өвийг хамгаалах тухай хуралдаан болсон бол өнөөдөр Япон Улсын хамгийн том театрт манай улсын морин хуурын чуулгынхан тоглолтоо хийлээ” гэв.