Монгол Улсын Ерөнхийлөгч Ухнаагийн Хүрэлсүх Монгол Улс, Япон Улсын хооронд дипломат харилцаа тогтоосны 50 жилийн ойг тохиолдуулан хоёр улсын харилцаа, хамтын ажиллагаанд үнэтэй хувь нэмэр оруулсан Япон Улсын иргэдийг төрийн одон, медалиар шагнах тухай зарлиг гаргасан. Зарлигийн дагуу шагналыг гардуулах ёслол Монгол Улсын Ерөнхийлөгч Ухнаагийн Хүрэлсүхийн Япон Улсын Засгийн газрын урилгаар тус улсад хийж буй төрийн айлчлалын үеэр боллоо.

     Энэ үеэр Алтан гадас одонгоор шагнуулсан Шимизү Такэноригийн баярын сэтгэгдлийн хуваалцсан юм. Тэрбээр “Би маш баяртай байна. Би Монгол Улсад суух Элчин сайдын албыг өгөөд 5-6 жил болж байна. Тус хугацаанд Монгол, Японыхоо харилцааг бэхжүүлэхийн төлөө идэвхтэй ажиллаж байсан. Их, дээд сургуулиудад Монголын тухай лекц уншдаг болохоор шавь нартайгаа хамт ирсэн. Миний авсан Алтан гадас одон бол миний гавьяа биш. Монголын тухай хамт судалгаа хийсэн оюутнуудтайгаа хамт авсан гэж баярлаж байна” гэлээ.