Монгол Улсын Ерөнхийлөгч Ухнаагийн Хүрэлсүх Япон Улсад төрийн айлчлал хийж байна. Энэ онд Монгол, Япон Улс дипломат харилцаа тогтоосны 50 жилийн ой тохиож байгаа билээ. Айлчлалын хүрээнд Монгол-Японы Төр, хувийн хэвшлийн аравдугаар зөвлөлдөх уулзалт болж байгаа юм. Тус уулзалтад Эдийн засаг, хөгжлийн сайд Ч.Хүрэлбаатар тэргүүтэй албаны хүмүүс болон Монгол, Японы 200 гаруй бизнес эрхлэгч, аж ахуйн нэгжийн удирдлага оролцож байна. Тодруулбал, Монголын талаас МАК-ийн ерөнхий захирал Б.Нямтайшир тэргүүтэй 60 гаруй бизнес эрхлэгч аж ахуйн нэгжийн удирдлага оролцож, санал, туршлага солилцож байгаа юм.

Ташрамд дурдахад, Монгол Улсын Ерөнхийлөгч Ухнаагийн Хүрэлсүх аравдугаар зөвлөлдөх уулзалтыг нээж үг хэлэхдээ “Япон бизнес эрхлэгчийн эрх ашгийг хамгаалж, ирэх  50 жилд хамтын ажиллагаагаа нягт нямбай болгож, алдаагаа засаж, хамтран ажиллах болно” гэдгээ илэрхийлсэн юм.

Энэ удаагийн уулзалт нь Монгол Улс, Япон Улс харилцаа тогтоосны 50 жилийн ойн хүрээнд болж байгаа гэдгээрээ онцлог болж байна.