Монгол Улсын Ерөнхийлөгчийн У.Хүрэлсүх БНХАУ-д тус улсын дарга Ши Жиньпиний урилгаар албан ёсны айлчлал хийж байна. Энэ үеэр нийтлэлч, судлаач Д.Баярхүүгээс тус айлчлалын ач холбогдлын талаар тодрууллаа.

     -Хөрш орнуудын найрсаг харилцаа, хамтын ажиллагааны хүрээнд хийж албан ёсны айлчлал нэлээд онцлогтой болж байна. Та судлаач хүний хувьд дээрх айлчлалын ач холбогдлын талаар мэдээлэл өгөхгүй юү?

     -2022 онд хийж буй уг айлчлалыг улс төрийн чухал ач холбогдолтой гэж үзэж байна. Учир нь цар тахлын нөхцөл байдлын дараа, БНХАУ-ын Коммунист намын 20 дугаар Их хурлын дараа, шинэ удирдагч болон намын төв хорооны бүрэлдэхүүн солигдсон цаг үед болж буй гэдгээрээ онцлогтой болж байна.  Мөн цар тахлын нөхцөл байдал, хөрш орны геополитикийн өөрчлөлтөөс шалтгаалж, дэлхийн эдийн засаг таагүй байна. Аль ч улсын гадаад худалдаа, хөрөнгө оруулалт зогсонги байна. Ийм зогсонги байдлыг арилгахад уг айлчлал өндөр ач холбогдолтой гэж үзэж байна.

      -Хоёр улс санамж бичгүүдэд гарын үсэг зурж байна. Энэ талаар мэдээлэл өгвөл?

      -Айлчлалын үед 16 чухал баримт бичигт гарын үсэг зурна. Үүнийг Монгол, Хятадын хоорондын харилцаанд улс төрийн өндөр ач холбогдолтой айлчлал боллоо гэж үзэж байгаа юм. Энэ нь хоёр улсын эдийн засаг, хөрөнгө оруулалтад эерэг нөлөө үзүүлнэ. Монгол Улсын хувьд гадаад худалдааны гол түнш нь Хятад Улс. Хоёр улс худалдааны эргэлтээ 10 тэрбум ам.долларт хүргэнэ гэж зорилго тавьж байсан бол 10.1 тэрбум ам.доллар болж, нэмэгдсэн сайн үр дүнтэй байна. Ойрын үед энэ үр дүнг 20 тэрбум ам.доллар болгоно гэж зорьжээ.

      Манай улсын экспортын гол бүтээгдэхүүн нүүрс байна. Нүүрсний экспортыг цаашид нэмэгдүүлэх шаардлагатай. Хэдий БНХАУ-ын зүгээс хүлэмжийн хийг бууруулах арга хэмжээ авч, нүүрсний экспортоос татгалзаж байгаа хэдий ч Монгол Улсын нүүрсийг худалдаж авах тал дээр энэ удаагийн уулзалд ахиц дэвшил гарах болов уу гэсэн хүлээлттэй байна. Бид өмнө нь 13 сая тонн нүүрс экспортлох нь ахиц гэж байсан бол 20 сая тонн болсон. Цаашид энэ тоог хоёр дахин нэмэгдүүлэх хүсэлт тавиад байна.

    -Хоёр талд хамтын ашигтай уулзалт болж байгаа. БНХАУ-ын зүгээс манайд ямар хүсэлт тавьж байгаа вэ?

-Хятад Улс ковидын хоёр жилд гадаад харилцаагаа зогсоосон байсан. Дараа нь Хятадын коммунист намын Их хурлын дараа Монгол Улсын Ерөнхийлөгч өөрөө ирж айлчлал хийж байгаа нь өндөр ач холбогдолтой гэж үзэж байгаа юм. БНХАУ 10 гаруй улстай хиллэдэг. Эдгээр орноос  Хятад, Монголын харилцаа үлгэр жишээ байх болно гэж тунхагладаг. Тиймээс энэ харилцаанд онц ач холбогдол байгаа нь тодорхой.