МАН-ын намын бүлэг хуралдаж, хуралдаанаас гарсан шийдвэрийг бүлгийн дарга Д.Тогтохсүрэн, ХЗДХ-ийн яамны сайд Х.Нямбаатар нар танилцууллаа.

            Хуралдаанаар Аялал жуулчлалын тухай хуулийн шинэчилсэн найруулгын төслийн талаар хэлэлцэж, шийдвэрлэжээ.

   УИХ-ын гишүүн Д.Тогтохсүрэн: Энэ хуулийн төслийг  Засгийн газраас УИХ-д одоогоор өргөн бариагүй байгаа.  Засгийн газар 2023, 2024, 2025 оныг монголд зочлох жил болгон зарласан. Үүнтэй холбогдуулан Аялал жуулчлалын тухай хууль болон түүнийг дагасан Казиногийн тухай хууль, Бооцоот тоглоомын тухай хууль зэрэг арав гаруй хуулийн төслийг оруулж ирж байгаа юм. Эдгээр хуулийн төслийг МАН дэмжиж, энэ ондоо багтаан батлах нь зүйтэй гэж үзэж байна.

ХЗДХ-ийн яамны сайд Х.Нямбаатар: Монгол Улс цар тахлын өмнөх жил буюу 2019 онд 580 мянга орчим жуулчдыг хүлээн авч, 610 орчим сая ам долларын орлого олсон гэх  статистик бий. Мөн ДНБ-ий зургаа орчим хувийг аялал жуулчлалын салбараас бүрдүүлсэн. Цаашид энэ ДНБ-ийг 30 хувьд хүргэх зорилгыг дэвшүүллээ. Иймд Аялал жуулчлалын тухай хууль болон дагалдах Казиногийн тухай хуулийг яаралтай батлах хэрэгтэй байна.