УИХ-ын чуулганы нэгдсэн хуралдаанаар Газрын тухай багц хуулийн төслийг хэлэлцүүлж эхэллээ. Хуралдааны эхэнд Байнгын хорооны санал дүгнэлтийг танилцуулж, хуулийн төсөлтэй холбоотой асуулт, асууж хариулт авч байна.

       УИХ-ЫН ГИШҮҮН Ц.САНДАГ-ОЧИР: Энэ хуулийг баталснаар аймаг, сум, дүүрэг хоорондын хилийн цэсийн маргаатай асуудал шийдэгдэх үү. Мөн Улсын тусгай хамгаалалттай Богд уул орчимд худлаа хэлж байгаад орон сууц барьчихсан, иргэд зээл аваад орон сууц бариулчихсан байна. Тэгээд орон сууцны ордер нь гардаггүй, иргэд банкны хүүд дарлуулж байгаа асуудал байна. Энэ замбараагүй барьсан орон сууцны асуудлыг яаж шийдэх вэ. Хот байгуулалтын ерөнхий төлөвлөгөө, хот байгуулалтын төлөвлөгөөг зөрчсөн тохиолдолд хэн хариуцлага хүлээх юм бэ. Төлбөрийн асуудал байна үүнийг яаж шийдэх вэ.      

     БАРИЛГА ХОТ БАЙГУУЛАЛТЫН ЯАМНЫ ДЭД САЙД Э.ЗОЛБОО: Тусгай хамгаалалттай газар нутагт зөвшөөрөлгүй барилга барьж байна гэх асуудал байна. Монгол Улсын газар нутгийн 20 орчим хувийг Тусгай хамгаалалттай газар нутгийн тухай хуулиар зохицуулж байна. Үүнийг Байгаль орчин аялал жуулчлалын яам хариуцдаг. Тусгай хамгаалалттай газар нутгийн тухай хуулийг Засгийн газраас шинээр боловсруулан өргөн мэдүүлнэ. Цаашид нэгдсэн байдлаар жилийн газар олголтын төлөвлөлтийг батална.