Засгийн газрын өнөөдрийн хуралдаанаар Хууль зүй, дотоод хэргийн сайд Х.Нямбаатар Аялал жуулчлалын тухай хуулийн анхдагч хуулийн үзэл баримтлалын талаар танилцууллаа.

       Тэрбээр “Монгол Улсын Ерөнхий сайд ирэх оныг Монголд айлчлах жил болгон зарлаж байгаатай холбогдуулан аялал жуулчлалын салбарыг хэрхэн хөгжүүлэх, дотоодын нийт бүтээгдэхүүний 30 хүртэлх хувийг үйлдвэрлэдэг салбар болгох хүрээнд Аялал жуулчлалын тухай хуулийг боловсруулсан. Ирэх долоо хоногт Засгийн газрын хуралдаанаар хэрэгжүүлэх бэлтгэл ажил хангаж байгаа. Аялал жуулчлалыг хөгжүүлэхэд нислэгийн давтамж, тизийн үнэ, Монгол Улсад ирэх визийн нөхцөл, хөнгөлөлт гэсэн асуудал тулгарч байгаа. Үүнийг ч энэхүү хуулиар давхар шийдэх юм. Монгол Улсад Аялал жуулчлалын чиглэлээр нислэгийн давтамж нэмэгдүүлэхэд төрөөс агаарын тээврийн салбарт бизнес эрхэлж байгаа аж ахуй нэгжүүдийг дэмжих асуудлыг ч энэ хуульд тусгасан. Харин визийн хөнгөлөлтийн асуудалд бид ирэх долоо хоногт Хууль зүй, дотоод хэргийн яам, Гадаад хэргийн яамтай хамтраад Монгол Улсад хамгийн олон улс орны визийн шаардлагаас хөнгөлж, визгүй хөнгөлөх орнуудын жагсаалтыг ирэх долоо хоногийн Засгийн газрын хуралдаанд танилцуулна. Аялал жуулчлалын тухай хуулийн хүрээнд гадаадаас ирсэн жуулчдад татварын буцаан олголт өгдөг тогтолцоог нэвтрүүлэх зүйлийг ч тусгасан байгаа. Мөн агнуурын зах зээлийн салбарыг илүү их нээлттэй болгох талаар ярьж байна. Ингэхдээ Аялал жуулчлалын хуулийг дагуулаад Агнуурын тухай хуулийг хөндье. Мөн Төлбөр тооцооны тухай хууль, Казиногийн тухай хуулийн төслийг өргөн барина" гэв.