Улс төрийн нөлөө бүхий томчууд эрх мэдэл албан тушаалаа ашиглаж, авлига авч, бусдад давуу байдал олгодог. Улмаар УИХ-ын гишүүний бүрэн эрх, халдашгүй дархан байдал гэсэн нэрээр халхавч хийж хууль хяналтын байгууллагад шалгагддаггүй, хийсэн хэрэг, булхиа нь илэрсэн ч шийдэгдэлгүй замхардаг байдал газар авчихлаа.

  Тэгвэл энэ удаагийн парламентад тухлан сууж буй авлига албан тушаалын хэрэгт холбогдсон ч одоог хүртэл хэрэг нь шийдэгдээгүй байгаа гишүүдийг танилцуулж байна.

УИХ-ЫН ГИШҮҮН А.АДЪЯАСҮРЭН

        УИХ-ын гишүүн А.Адъяасүрэн нь ачаа тээврийн С зөвшөөрлийн асуудлаар хууль, хяналтын байгууллагад шалгуулж, уг хэрэг нь одоо хүртэл шийдэгдээгүй байна.

    Тэрбээр УИХ-ын гишүүн болохоосоо  өмнө АТҮТ-ийн Тээвэр зохицуулалтын хэлтсийн дарга асан Г.Доржпаламд 100 мянган ам.доллар өгсөн гэх хэрэгт холбогдон шалгуулж буй талаар бид өмнө нь мэдээлж байсан.  Уг хэргийг АТГ-аас УЕПГ-т шилжүүлсэн ч мөн л  хэрэг бүрэн шийдэгдээгүй байна. Тэр байтугай Ерөнхий сайд Л.Оюун-Эрдэнэ  "Далд эдийн засаг цэгцлэхэд Монгол Улсын дотоодын нийт бүтээгдэхүүн хоёр дахин тэлэхээр байгаа юм. Тухайн газарт олон автомашин бий. Автомашинд УИХ-ын гишүүн А.Адъяасүрэнгээс эхлээд нэр бүхий гишүүд холбогдсон. Цаана нь нөлөө бүхий том лидерүүд байгаа" хэмээн мэдэгдчихээд байхад хууль хяналтын байгууллага дээр хэрэг нь гацсаар байна.

УИХ-ЫН ГИШҮҮН Б.БЕЙСЕН

       УИХ-ын гишүүн Б.Бейсен Баян-Өлгий аймгийн Нийгмийн даатгалын хэлтсийн дарга, Нэгдсэн эмнэлгийн эмч нарын эрх мэдэл, албан тушаалаа урвуулан ашиглаж, бусдаас авлига авч, хуурамч онош тогтоосон хэрэгт буруутган АТГ-т шалгаж байв. 

Баян-Өлгий аймгаас сонгогдсон Б.Бейсен гишүүнийг тус аймгийн Нийгмийн даатгалын хэлтсийн дарга тэргүүтэй Нэгдсэн эмнэлгийн эмч нарын эрх мэдэл, албан тушаалаа урвуулан ашиглаж, бусдаас авлига авч, хуурамч онош тогтоосон хэрэгт татан шалгаж байгаа юм. УИХ-ын Б.Бейсэн тэргүүтэй 59 хүнийг Эрүүгийн хуульд заасан хахууль авах, мөнгө угаах, нотлох баримт хуурамчаар үйлдэх гэмт хэрэгт холбогдуулан яллагдагчаар татан шалгаж байгаа аж. Тус хэрэг түүнийг УИХ-ын гишүүн болохтой зэрэгцэн сөхөгдсөн ч өнөөдрийг хүртэл шийдэгдээгүй байна. Тэрбээр энэ талаараа "Би нэг удаа прокурорын байгууллагад очиж тайлбар өгсөн. Намайг нэг хүн цусны шинжилгээ авахдаа 100 мянган төгрөг авсан гэж гүтгэсэн байна лээ. Үүнээс өөрөөр намайг хууль хяналтын байгууллагаас шалгаагүй. Эмч нартай холбоотой авлигын хэргийг Авлигатай тэмцэх газраас шалгаж байгаа юм билээ" гэх тайлбарыг өгч байв.

УИХ-ЫН ГИШҮҮН С.ОДОНТУЯА

             Ерөнхий сайд Л.Оюун-Эрдэнэ Засгийн газрын 100 хоногийн мэдээлэл хийх үеэрээ УИХ-ын дэд дарга С.Одонтуяаг нөхрийн хамт вакцины татан авалтад саад учруулсан хэмээн зарлаж, улмаар АТГ-т шалгуулах хүсэлт  өгсөн удаатай.

        С.Одонтуяа УИХ-ын 2020 оны ээлжит сонгуулийн өмнөхөн Дорноговь аймагт байрлах “Арвижих хоршоо” гэх аж ахуйн нэгжийн нэрээр 10 гаруй чингэлэг буюу 15 тонн бэлэн хувцас хилээр нэвтрүүлсэн байдаг. Ингэхдээ “Комиссын бараа” хэмээн гаалийн бүрдүүлэлт хийсэн. Гэтэл уг хувцас нь “комиссын хувцас” биш, нэр бүхий брэндийн хувцас байсан нь илэрсэн. Цөөнгүй тооны ам.долларын брэндийн хувцсыг хуучин хувцас хэмээн татвараас зайлуулсан нь илчигдсэн. Дорноговь аймгийн гаалийн байцаагч Э-тэй үгсэн хуйвалдах замаар үйлдсэн болох нь мөрдөн байцаалтын явцад тогтоогдож, шалгагдаж буй.

УИХ-ЫН ГИШҮҮН Б.ПҮРЭВДОРЖ

      УИХ-ын гишүүн Б.Пүрэвдоржийг Иргэний харьяалал, шилжилт хөдөлгөөний ерөнхий газар даргаар ажиллаж байхдаа эрх мэдлээ урвуулан ашиглаж, хууль зөрчсөн байж болзошгүй гэх үндэслэлээр АТГ шалгагдаж байв.

       Мөн ИХШХЕГ-ын даргаар ажиллаж байхдаа албан тушаалаа урвуулж, улсад 276 сая төгрөгийн хохирол учруулсан, Засгийн газрын тусгай сангийн хууль зөрчиж, Мал хамгаалах сангаас нэн хөнгөлөлттэй нөхцөлөөр их хэмжээний зээл авахад эрх мэдлээ ашиглан оролцсон гэх үндэслэлээр түүнийг хууль, хяналтын байгууллагаас шалгаж байгаа талаар бид мэдээлсэн. Өнөөдрийг хүртэл хэрэг хэрхсэн талаар мэдээлэл байхгүй байна.

УИХ-ЫН ГИШҮҮН Н.АЛТАНХУЯГ

       УИХ-ын гишүүн Н. Алтанхуяг Ерөнхий сайдаар ажиллаж байхдаа Хөгжлийн банкнаас “Хөтөл”, “Кью Си Эс” компанид зээл олгосон асуудалд  нэр холбогдсон.  Улмаар Улсын ерөнхий прокуророос УИХ-ын гишүүн Н.Алтанхуягийг Хөгжлийн банкны хэрэгт холбогдуулан шалгахаар бүрэн эрхийг түдгэлзүүлэх саналыг УИХ-д хүргүүлж байсан.

     Тодруулбал,  төрийн өмчит “Эрдэнэс Монгол” ХХК Хөгжлийн банкнаас 170 тэрбум төгрөгийн зээл авч, тэр мөнгөөрөө “Энержи ресурс” ХХК-иас Гашуунсухайтын 239 км авто замыг худалдаж авсан. Улмаар тус автозамын ашиглалт, засвар үйлчилгээний өмнөх хариуцагч “Говийн зам” ХХК-ийг төрийн өмчит “Гашуун сухайт авто зам” ХХК нэртэйгээр шинэчлэн байгуулж, Гашуун сухайтын 239 км авто замыг хариуцуулсан гэх хэрэгт холбогдуулан хууль хяналтын байгууллагаас шалгажээ.

УИХ-ЫН ГИШҮҮН Ё.БААТАРБИЛЭГ

       УИХ-ын гишүүн Ё.Баатарбилэгийг Хөгжлийн Банкны хэрэгт холбогдсон асуудлаар хилээр гарахыг хязгаарлах таслан сэргийлэх арга хэмжээ авах эсэхийг шийдэх талаар хэлэлцэж байсан.  

Тодруулбал, Ё.Баатарбилэгийг Хөгжлийн банкнаас "НВЦ" ХХК-д зээл олгоход нөлөөлж, тус компанийн захирал Ц.Баатарбилэгээс 100 сая төгрөгийн авлига авсан гэх хэрэгт холбогдуулан хууль хяналтын байгууллагаас шалгаж байгаа билээ.

   Энэ талаар тэрбээр "НВЦ" компанийн захирал Ц.Баатарбилэг 2017 онд Хөгжлийн банкнаас зээл авсан. Би найзын хувиар нөлөөлж тусалсан зүйл огт байхгүй. Намайг жолоочоороо дамжуулж мөнгө авсан гэх яриа гараад байна. Энэ асуудал хууль хяналтын байгууллагын шалгалтын нарийн горимд явж байгаа учраас миний зүгээс тайлбар өгч болохгүй" гэх тайлбарыг хийж байсан.

УИХ-ЫН ГИШҮҮН Ж.ЭРДЭНЭБАТ

             УИХ-ын гишүүн Ж.Эрдэнэбатыг АТГ-аас шалгаж, мөрдөн байцаалтын явцад гэмт буруутайг нь тогтоон, 2019 оны есдүгээр сарын 19-нд яллагдагчаар татагдсан.  Гэвч түүний хэргийг хууль, хяналтын байгууллага бүрэн шалгаагүй байх магадлалтай гэж үзэн батлан даалтаар суллагдсан. Үүний дараа 2020 оны сонгуульд нэр дэвшиж, УИХ-ын гишүүнээр сонсогдон тангарагаа өргөсөн. Тэгвэл одоо УИХ-ын гишүүний халдашгүй дархан эрх гэх үндэслэлээр түүний хэрэг хууль хяналтын байгууллагаар шалгагдахгүй байна гэх шүүмжлэл олон нийтийн дунд бий.

         Тодруулбал, тэрбээр “Өмнөговь аймгийн Гурвантэс сумын нутагт орших “Улаан сайр-2” нэртэй .... тоот дугаартай талбайг 2017 оны арванхоёрдугаар сарын 21-ний өдөр “Элбэг орд” ХХК-иас “Хэрх-илч” ХХК худалдан авах гэрээ байгуулсан.  Худалдан авагч “Хэрх-Илч” компанийг Ерөнхий сайд асан Ж.Эрдэнэбатын төрсөн дүү Ж.Эрдэнэтөгс нар 31/69 хувийн харьцаатай эзэмшдэг. Нүүрсний нөөц бүхий 1463 га-г хамардаг ашигт малтмалын тусгай зөвшөөрлийг ердөө таван сая төгрөгөөр худалдан авсан. Уг талбайн зөвшөөрөл 2017 оны есдүгээр 26-ны өдөр албан ёсоор гэрчилгээгээ авсан. Гэрчилгээ авснаас хойш гурван сарын дараа зарагджээ. Гэвч Ерөнхий сайд Ж.Эрдэнэбатын эзэмшдэг “Хэрх-Илч” компани хямдхан авсан тусгай зөвшөөрлөө дахин зургаан сарын дараа заржээ. Ингэхдээ Ерөнхий сайд асан Ж.Эрдэнэбат өөрийн сайн найз “Алтай Констрашкн”-ы Х.Бат-Эрдэнэд ердөө нэг сая төгрөгөөр зарсан” гэх хэрэгт холбогдон шалгагдаж байгаа.

УИХ-ЫН ГИШҮҮН Х.БОЛОРЧУЛУУН

      УИХ-ын гишүүн Х.Болорчулуунд холбогдох ЖДҮДС-гаас зээл авсан асуудлыг АТГ шалгасан хэвээр байна.

 “Дорнод гурил” ХХК нь 2016 оны арваннэгдүгээр сарын 20-нд ЖДҮХС-аас хоёр тэрбум төгрөг авсан. Ингэхдээ Х.Болорчулуун гишүүн Дорнод аймгийн Хүнс, хөдөө аж ахуйн газрын дарга асан А.Энхтүвшинтэй хуйвалдаж, хуурамч бичиг баримт бүрдүүлж, зээл авсан гэдэг нь тогтоогдсон гэх мэдээлэл цацагдсан.  А.Энхтүвшин нь Хүнс, хөдөө ах ахуй, хөнгөн үйлдвэрийн яамны ЖДҮХС-нд “Дорнод аймгийн Хэрлэн сумын нэгдүгээр багт байрлах “Дорнод гурил” ХХК нь жижиг, дунд үйлдвэр эрхлэгч болохыг тодорхойлов” хэмээн жилийн хэдэн тэрбумын орлоготой, үйлдвэрлэлтэй тус компанийг ЖДҮ хэмээн хуурамчаар тодорхойлсон. Тиймээс АТГ-аас Х.Болорчулууныг хуурамч бичиг баримт бүрдүүлэхээс гадна сангаас авсан зээлээ зориулалтын бусаар ашигласан гэх хэргээр шалгаж байгаа юм.