Цахим хөгжил, харилцаа холбооны яамны дэд сайд Б.Болор-Эрдэнэтэй холбоотой мэдээлэл өнгөрсөн долоо хоногт цахим сүлжээнд цацагдсан.

    Тодруулбал, дэд сайд Б.Болор-Эрдэнэ өнгөрсөн жил олон улсын хуралдаанд оролцох үеэрээ ОХУ-д боловсрол эзэмшсэн төрийн албаны дунд шатны, ахимаг насны төрийн алба хаагчид Монгол Улсын хөгжилд саад болж байна гэх утгатай зүйл ярьсан нь бухимдал дагуулаад байгаа юм.

Энэ талаар ЗГХГ-ын дарга Д.Амарбаясгалан дараах тайлбарыг өглөө.

  Тэрбээр “Дэд сайд Б.Болор-Эрдэнэтэй холбоотой асуудал өнгөрсөн тав дахь өдрөөс эхлэн яригдаж байна. УИХ-ын зарим нэр бүхий гишүүн энэ залуу сайд нартай холбоотой зарим зүйлсийг ярьж байсан байна лээ. Бидний зүгээс урьдчилсан байдлаар зохион байгуулалттай зүйл хийж байна гэж харж байна. Тэгж харж байгаа  шалтгаан нь “Нэг жилийн өмнө яригдсан яриаг тастаж оруулсан байна. Дээрээс нь орчуулгыг тодорхой хэмжээнд  гуйвуулж,  олон нийтийн дургүйцлийг хүргэх хэмжээнд энэ асуудлыг бий болгож тавьжээ” гэж Б.Болор-Эрдэнэ өөрөө тайлбар хийсэн байна лээ. Хараахан уулзаж, албан ёсны тайлбарыг нь авч амжаагүй байна. Албан ёсны тайлбар авч, хэрхэн шийдвэрлэх эсэхийг Засгийн  газрын хурлаар шийдвэрлэнэ. Ерөнхий сайд дангаараа сайдыг томилох, огцруулах асуудлыг шийдвэрлэдэг. Тэгвэл дэд сайдын асуудал Засгийн газрын хурлаар шийдэгддэг учраас бид албан ёсны тайлбарыг сонсож, бусад зүйлийг нь судалж үзсэний үндсэн дээр шийдвэр гаргана. Дээрээс нь нэг жилийн өмнөх яриа яагаад гарч ирэв гэдгийг судлах хэрэгтэй. Аливаа зүйл дээр бусдыг хэлмэгдүүлж болохгүй. Мэдээж  удирдах албан тушаалтан илүү хариуцлагатай, хүний  эрхийг дээдэлсэн байх ёстой гэх зарчим мэдээж үйлчилж байгаа. Энэ бүх зүйлийг олон талаас нь бодолцож Засгийн газар шийдвэрээ гаргана” гэлээ.