УИХ-ын даргын дэргэдэх зөвлөлөөс гаргасан хуваарийн дагуу Байнгын хороод хуралдаж байна.

  Хуралдааны үеэр УИХ-ын гишүүн Б.Энхбаяр Монгол Улсын Дээд Шүүхийн шүүгчид нэр дэвшиж буй гурван хүнтэй танилцах сонсгол хийх гэж буй талаар  мэдээллээ.

 Тэрбээр  “Монгол Улсын Дээд  Шүүхийн  шүүгчид  нэр дэвшигчидтэй  УИХ танилцах сонсгол хийдэг.  Харин дэмжинэ, дэмжихгүй гэх санал хураалтыг  явуулдаггүй. Шүүх эрх мэдэл бол бие даасан  байх ёстой. Тэр дотроо хууль тогтоох эрх мэдлээсээ ч хараат бус бие даасан байх ёстой гэх  агуулгаар танилцдаг. Энэ танилцаж  байгаа үйл ажиллагааны цаана олон асуудлууд байдаг. Хоёр жилийн өмнө  Монгол Улсын Дээд Шүүхийн шүүгчид голомтын шүүгч оруулж ирлээ гэж ХЗБХ-нд гомдол гаргаж байсан. Тиймээс парламентаар дамжуулан шүүх эрх мэдлийн дээд байгууллага болсон Монгол Улсын Дээд Шүүхийн шүүгчидтэй ард иргэдийг танилцуулах нь энэ сонсголын томоохон ач холбогдол юм. Энэ хүний намтар, ашиг сонирхол, бодлого нь ямар вэ гэдгийг ард иргэдтэйгээ хамтдаа танилцах ийм хөшүүргүүд бий.  Үүний дагуу Монгол Улсын Дээд Шүүхийн шүүгчид нэр дэвшиж буй гурван хүнтэй танилцах сонсголыг  21 хоногийн дараа хийхээр тов зарлаад байна.  Энэ  танилцах сонсгол  нь Үндсэн Хуулийн Цэц дээр Үндсэн хууль зөрчсөн гэх маргаан үүсгээд байгаа юм. ” гэлээ.