УИХ-ын нэгдсэн чуулганаар Төрийн албаны тухай хуульд нэмэлт өөрчлөлт оруулах тухай хуулийн төслийн анхны хэлэлцүүлэг явуулсны дараа төрийн байгууллагын санал дүгнэлт, зарчмын зөрүүтэй саналыг хэлэлцлээ. Энэ үеэр УИХ-ын гишүүн Ш.Адьшаагийн асуултад Төрийн албаны зөвлөлийн дарга Б.Баатарзориг хариулт өглөө.

      Тэрбээр “Төрийн албаны шинэтгэлийн хүрээнд иж бүрэн цалин хөлсний шинэтгэлийг үе шаттайгаар судалж, оруулж ирж байгаа. Энэ жилийн тухайд төсвийн хуулиар гол таван алхмын шинэтгэл хийхээр оруулж ирсэн. Төрийн захиргааны болон төрийн тусгай албан хаагчийн цалинг 15 анги зэрэглэлтэй, дотроо таван шатлалтайгаар хувааж байгаа. Ингэхдээ хамгийн өндөр шатлалаар нь авч цалинг нэмэгдүүлэхээр ажиллаж байна. Мөн хөдөлмөрийн хөлсний доод хэмжээ нэмэгдэж байгаатай холбоотойгоор цалин хөлс нь нэмэгдээгүй бага цалинтай төрийн албан хаагчийн цалин нэмэгдүүлэх асуудал тусгагдаж орж ирсэн. Гуравдугаарт, Таван жил тутамд олгодог байсан төрийн албан хаагчийн урамшууллыг жил бүр олгох зохицуулалт хийж байгаа.Төрийн захиргааны албан хаагч орон нутгийн нэмэгдэлтэй болох, үр дүнд суурилсан цалин хөлсний нэмэгдэл гээд олон багц асуудал орж ирж байна.

     Мөн орон нутагт төрийн захиргааны албан хаагчид ажиллах нөхцөл туйлын хангалтгүй байгаа асуудал олон байна. Хууль бус томилгоотой холбоотойгоор Төрийн албаны зөвлөлөөс олон ажил зохион байгуулсан. Өнгөрсөн жил 417 байгууллагад шалгалт зохион байгуулсан. Ингэхдээ 577 төрийн албан хаагч хууль бусаар томилогдсонтой холбоотойгоор Төрийн албаны зөвлөлөөс ажлаас нь чөлөөлөх шийдвэр өгч, хэрэгжүүлсэн.  Төрийн албан хаагчийн сонгон шалгаруулалтад нэгт орсон хүнийг томилоогүй асуудал гарсан. Тухайн томилж байгаа хүнд нэг удаа буцаах эрх бий. Үүнээс өөрөөр зөрчил гаргасан тохиолдолд Төрийн албаны зөвлөлөөс арга хэмжээ авна” гэв.