Засгийн газрын ээлжит хуралдаан үргэлжилж байна. Хуралдаанаас хэд хэдэн албан тушаалтныг ажлаас нь чөлөөлсөн талаар эх сурвалжилж мэдээллээ.

     Тодруулбал, ШШГЕГ-ын дарга Д.Загджавыг үүрэгт ажлаас нь чөлөөлөх шийдвэр гарчээ. Хууль хяналтын байгууллагаас Ажлын хэсэг гарч, Д.Загджавыг алдаа дутагдал гаргасан эсэхийг шалгаж байсан юм. Тэгвэл Ажлын хэсгийн шалгалтаар ШШГЕГ-ын дарга Д.Загджавыг хариуцлага алдсан, алдаа дутагдлаа ухамсарлаагүй, удирдан зохион байгуулаагүй, үүний улмаас хэд хэдэн хүмүүжигч хорих ангиас оргосон, хорих ангийн байранд хоригдогч нар нас барсан гэж үзжээ.

Ташрамд дурдахад, Д.Загджав нь өнгөрсөн 2020 оны долдугаар сард ШШГЕГ-ын даргаар томилогдож байсан юм. Мөн 2022 оны долдугаар сард Ерөнхийлөгчийн зарлигаар генерал цол хүртсэн билээ.

Д.ЗАГДЖАВ ГЭЖ ХЭН БЭ

     Дэлэгийн Загджав 1964 онд Ховд хотод төрсөн. Тэрбээр Ховд хотын 10 жилийн нэгдүгээр дунд сургууль, 1985 онд Нийгмийг аюулаас хамгаалах яамны Цэргийн дээд сургууль төгссөн. Мөн 1999 онд Төрийн захиргааны удирдлагын хөгжлийн институт, 2000 онд Төрийн удирдлагын академи, 2003 онд ОХУ-ын Новосибирск хотын Эдийн засгийн удирдлагын академийг тус тус дүүргэжээ. Удирдахуйн ухааны магистр, улс төрийн ухааны доктор, ОХУ-ын Батлан хамгаалах, аюулгүй байдал, эрх зүйн академийн профессор. Загджав 1985-1987 онд Дорноговь аймгийн Цагдан сэргийлэх хэлтэс, 1987-1993 онд Ховд аймгийн АДХГЗ-ын дэргэдэх Хууль зүй, арбитрын хэлтэст ахлах мэргэжилтэн, хэлтсийн дарга, 1990-1993 онд Ховд аймгийн шүүхэд аймгийн шүүхийн гишүүнээр ажиллаж байгаад 1993 онд "Алтай интернэйшнл" ХХК-г байгуулан ерөнхий захирлаар ажиллаж байжээ. 2017 оны гуравдугаар сарын 15-нд Уул уурхай, хүнд үйлдвэрийн дэд сайдаар томилогдож байсан. МАН-ын гишүүн.

      Мөн 1997 онд МАХН-ын бага хурлын гишүүн болсноор улс төрд орж, 1998-2000 онд Ардчилсан Социалист Оюутны холбооны Ерөнхийлөгчийн албыг хашсан. 2000-2008 онд нийслэлийн Хан-Уул дүүргийн засаг даргаар ажиллаж байгаад 2008 онд МАХН-аас нэр дэвшин УИХ-ын гишүүнээр сонгогдож дөрвөн жил ажилласан. Мөн Байгаль орчны яамны Төрийн нарийн бичгийн дарга, Монголын Энхтайван, найрамдлын байгууллагын Ерөнхийлөгчөөр ажиллаж байжээ.