2023 оны төсвийн төсөлд Гүйцэтгэх засаглал дахь хяналтын тухай хуулийн төслийг дагалдуулан оруулсан талаар мэдээлсэн. Ингэснээр Засгийн газрын хэрэг эрхлэх даргын эрх мэдэл нэмэгдэж, төрийн албанд төрийн хяналт тогтоох нөхцөл үүссэн байж болзошгүй байгаа юм. Энэ талаар бид УИХ дахь МАН-ын бүлгийн дарга Д.Тогтохсүрэнгээс зарим зүйлийг тодрууллаа.

     -Гүйцэтгэх засаглал дахь хяналтын тухай хуулийг шинээр төсөвтэй хамт оруулж байгаа юм байна. Яагаад шинэ хуулийн төслийг хавсралтаар оруулж байгаа юм бэ?

      -Мэргэжлийн хяналтын байгууллагаа шинээр хувааж байгаа юм. 12 хяналтын байгууллагыг яамдад нь шилжүүлээд сайдынхаа харьяалалд очиж байгаа гэсэн үг. Боловсрол, эрүүл мэнд, хүнс, хөдөө аж ахуй гэх мэт салбарууд. Яамнаас бодлого гаргана, гүйцэтгэлээ зохион байгуулна, хяналтаа тавина. Гүйцэтгэх засаглал дахь хяналтын тухай Засгийн газар дахь хяналтын тухай хууль гэж нэрийг нь өөрчлөхөөр болсон. Энэ хууль бол саяын явж байгаа мэргэжлийн хяналтын байгууллагууд яамд дээрээ үйл ажиллаагаа нь зөв явж байна уу, үгүй юү гэдгийг хянах юм. Хоёрдугаарт, төрийн бодлого, УИХ, Засгийн газраас гаргасан шийдвэр хэрэгжиж байна уу гэдэг дээр ерөнхий хяналт тавина. Ийм чиг үүрэгтэй агентлагийг байгуулах гэж байна.

      -Хуулийн төслөөс харахад Засгийн газрын хэрэг эрхлэх газрын даргыг эрх мэдэл албан тушаал нэмэгдэж байгаа юм биш үү?

-Үгүй ээ. Засгийн газрын хэрэг эрхлэх газрын даргын харьяанд байна. Гэхдээ Засгийн газраас гарч ирсэн хуулийн төсөл нь даргыг нь ЗГХЭГ-ын дэд дарга байна гэдгийг нь оруулж ирсэн. Агентлагийн дарга нь тусдаа байна. Хэрэг эрхлэх газрын даргын харьяанд байж Засгийн газарт хяналт тавина.