Д.БАТЛУТ: Шүгэл үлээгчийн эрх зүйн байдлын тухай хууль хэрэгжиж эхэлбэл 1930-аад оны үйл явдал давтагдах вий

2022-10-20, 538

УИХ-ын чуулганы нэгдсэн хуралдаанаар Шүгэл үлээгчийн эрх зүйн байдлын тухай хуулийн төсөл болон хамт өргөн мэдүүлсэн хуулийн төслүүдийг хэлэлцүүлж байна.

УИХ-ын гишүүн Д.Батлут: Шүгэл үлээснээрээ мөнгө авах боломжтой гэж үзээд хилсээр хүнийг гүтгэх матах явдал гарах вий. Энэ хууль хэрэгжиж эхэлбэл 1930-аад оны үйл явдал давтагдах вий. Үүнийг яаж хязгаарласан бэ. Төрийн албаны нууцыг энэ хуульд хамааруулахгүй гэж ээ. Том хулгай төрийн нууц гэсэн тамгатай явдаг шүү дээ. Үүнийг анхаараарай. Шүгэл үлээх сувгаа нээлттэй байлгаж болохгүй юү.

Хууль зүй, дотоод хэргийн сайд Х.Нямбаатар: Шүгэл үлээгчийн эрхзүйн байдлыг бид хуульчилж байгаа хоёр үндсэн шалтгаан бий. Нэгдүгээрт, төрийн байгууллага албан тушаалтан, нийтийн эрхзүйн субъектуудын хууль бус үйлдэл, үйл ажиллагааг олон нийтийн хяналтад оруулах. Хоёрдугаарт, шүгэл үлээж байгаа хүмүүсийнхээ эрхзүйн байдлыг хамгаалж, элдэв шахалт хавчлага, дарамт, хардлага, мөрдлөгөд оруулахгүй байх үүднээс эрхзүйн байдлыг нь хамгаалж өгч байгаа.

Байнгын хорооны хурлаар хэлэлцэж байхад 1990-ээд оноос өмнөх матаасын тогтолцоог эргүүлж сэргээж байна гэсэн болгоомжлол байсан. Ялангуяа 1990-ээд оноос өмнө амьдарч байсан ах эгч нарт комплексууд байгаад байна. Өөрөөр хэлбэл, хуучин нийгмийн үед хүнийг үндэс угсаа, язгуур гарал, шашин шүтлэгээ нууж хаасныг илчилж, матдаг тогтолцоонууд байсан. Үндэс угсаа, гарал үүслээр нь хэлмэгдүүлдэг тогтолцоо байсан. 1992 оны Үндсэн хууль, 1948 оны түгээмэл тунхаг, хүний эрхийн суурь зарчмуудад нийцсэн эрхзүйн тогтолцоогоор явж байгаа юм. Тэгэхээр хуучны матаасны тогтолцоотой үүнийг адилтгаж болохгүй. Үүнийг цэвэр олон нийтийн хяналт руу чиглүүлж байгаа.

Шүгэл үлээгчийн хамгаалж, урамшуулалтай болгох, бүх хэргийг олон нийтийн хяналт руу чиглүүлэх зорилгоор энэ хуулийг оруулж байгаа. Энэ хуульд төрийн албан тушаалтайн албан үүргээ гүйцэтгэж байх хугацаандаа авлига, ашиг сонирхлын талаарх мэдээллээр шүгэл үлээхэд Төрийн болон албаны нууцын тухай хууль, Хувь хүний нууцын тухай хуулийн хязгаарлалт хамаарахгүй шүгэл үлээх эрх нь нээлттэй байгаа.

Д.БАТЛУТ: Шүгэл үлээгчийн эрх зүйн байдлын тухай хууль хэрэгжиж эхэлбэл 1930-аад оны үйл явдал давтагдах вий

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.