ХНХ-ын сайд асан, УИХ-ын гишүүн Д.Сарангэрэлийг эгүүлэн татах асуудлаар иргэн н.Түвшинбаяр Үндсэн хуулийн цэцэд гомдол гаргасан байна. Энэ талаар бид түүний өмгөөлөгч Б.Гомбодоржтой холбогдож, тодрууллаа.

     -УИХ-ын гишүүн Д.Сарангэрэлийг эгүүлэн татах гомдлоо Үндсэн хуулийн цэцэд хэзээ өгсөн юм бэ?

      -Нийгмийн бодлогын байнгын хорооны хуралдаанаар Халамжаас хөдөлмөрт шилжих хэлэлцүүлгийн үеэр ХНХ-ын сайд асан, УИХ-ын гишүүн Д.Сарангэрэл “ул”-ны айлууд гэж ярьсан. Үүнийг нь иргэн Түвшинбаяр Үндсэн хууль зөрчсөн гэж үзээд Үндсэн хуулийн цэцэд аравдугаар сарын 4-нд гомдол гаргасан. Гаргасан гомдлыг 14 хоногийн хугацаанд маргаан үүсгэх эсэхийг шийдвэрлэнэ.

      -Д.Сарангэрэл гишүүн Үндсэн хуулийн ямар ямар зүйл заалтыг зөрчсөн гэж үзэж байгаа юм бэ?

       -Үндсэн хуулийн 1.2, 14.1, 14.2, 16.4, 16.14, 17.2, 23.1, 23.2, 27.1, 28.1, 29.3, 38 дугаар зүйл, 45.1, 45.2 дугаар зүйлийг тус тус зөрчсөн гэж үзэж байна. Түүнчлэн УИХ-ын тухай хуулийн 7.7.2 буюу гишүүний тангаргаа зөрчсөн гэж үзэж байгаа. УИХ-ын гишүүний тангараг дээр Үндсэн хуулийг сахиж мөрдөнө гэж байгаа юм. Тэгэхээр “ул”-ны айл гэж хэлснээрээ 1500 гаруй иргэний эрх ашгийг зөрчиж байгаа юм.

         -Та өмгөөлөгчийн хувьд энэ гомдлыг хууль зүйн үндэслэлтэй гэж харж байна уу?

      -Тухайн иргэн нь Хан-Уул дүүргийн харьяатай. Д.Сарангэрэл гишүүн өөрөө тус дүүргээс сонгогдсон. Тухайн иргэн нь төлөөлөгч гэж сонгож илгээсний хувьд гомдол гаргах хууль зүйн үндэслэлтэй. Иргэний гаргасан гомдлын дагуу УИХ-ын гишүүн Д.Сарангэрэлийг эргүүлэн татах хууль зүйн үндэслэлтэй.