Баян-Өлгий аймгийн Засаг дарга Д.Бауыржан автомашин жолоодож яваад зам тээврийн осол гаргажээ. Тодруулбал, тэрбээр өнгөрсөн амралтын өдөр Баян-Өлгий аймгийн төвөөс гарах гэж яваад замын хажуу автомашинтайгаа унажээ. Мөн олон нийтийн сүлжээнд түүнийг осол гаргах үедээ согтуу байсан гэх мэдээлэл цацагдаад байна.

Тэгвэл бид энэ талаар Баян-Өлгий аймгийн Засаг дарга Д.Бауыржантай холбогдож, тодрууллаа. Тэрбээр “Би хувийн эзэмшлийн автомашинаа жолоодож яваад осол гаргасан нь үнэн. Осол гарах үед би ганцаараа явж байсан бөгөөд цоо эрүүл байсан. Автомашинаа жолоодоод явж байх үед урд талын дугуй хагарч, замын хажуугийн овоолсон шороон дээр унасан. Осол болсон даруй цагдаагийн албан хаагчид ирж хэмжилт, бүртгэл хийсэн. Намайг эрүүл байсан гэдгийг цагдаа нар батална. Эмнэлгийн тусламж авахаар сүйдтэй гэмтэж, бэртээгүй. Миний биеийн байдал зүгээр учраас би ажлаа хийгээд сууж байна. Зохион байгуулалттайгаар намайг согтуу байсан гэж гүтгэж, харлуулж, дайрч байна” гэлээ.