Хот хариуцсан сайд Ж.Сүхбаатар нийтийн тээврийн парк шинэчлэлийн талаар мэдээлэл өглөө.

     Тэрбээр “Түгжрэлийн бодлогын арга хэмжээний суурь хэсэг болсон нийтийн тээврийн менежмент, парк шинэчлэлийн асуудал хоцрогдоод байна. Улсын төсөвт Засгийн газар бодлого гаргаад шинэчлэхээр зорьж байна. 13 жилийн өмнө парк шинэлчлэл хийж байсан. Тиймээс одоо яригдаж байгаа төсөвт ирэх онд нийслэлд хэрэгжиж байгаа парк шинэчлэлийн ажлын нэг хэсгийг үргэлжлүүлээд, парк шинэчлэлийн асуудалд 318 тэрбум төгрөгийн төсөв ороод ирсэн байгаа. Одоо бол 1432 автобус манай улсад хэрэгтэй байгаа. Эдгээр нь 124 чиглэлд маршрутад ажиллах ёстой юм байна гэсэн төлөвлөгөө гарсан. Харин он гараад 556 автобус ашиглалтаас гарах байгаа. Тэгэхээр эдгээрийг нөхөх автобус байхгүй. Иймээс энэ ондоо багтаад шинэ автобус оруулж ирэх асуудал яригдаж байна. Улаанбаатар хотын нийтийн тээвэр  гэдэг  түгжрэлийн суурь нь. Үндсэндээ нийтийн тээврийн асуудлыг шийдэхгүй бол түгжрэлийг шийдэх гарц гаргалгаа байхгүй. Уг нь бол манай хотын төвд нийтийн тээвэр ноёрхох ёстой. Нийтийн тээвэр гэдэг бол өргөн ойлголт. Такси, метро, карпүүл, пүүжин тээвэр цөм орж байна. Иймээс 2023 оны Засгийн газрын төсөвт 300 гаруй тэрбум төгрөг тусгаж, нийтийн тээврийн шинэчлэл хийхээр зорьж байна” гэв.